Ռուսաստանի արտաքին հետախուզության ծառայության տնօրեն Սերգեյ Նարիշկինը ՏԱՍՍ լրատվական գործակալությանը տված հարցազրույցում ասել է, թե Ուկրաինայի հարցով բանակցությունների պայմանները դեռ պետք է հասունանան:
«Վաղ թե ուշ բանակցությունները հնարավոր կլինեն, դա բնական է, քանի որ ցանկացած հակամարտություն, այդ թվում՝ զինված, ավարտվում է բանակցություններով, բայց դրանց պայմանները դեռ պետք է հասունանան», - ասել է Նարիշկինը:
Նա հաստատել է, որ հունիսի վերջին հեռախոսով զրուցել է ԱՄՆ-ի կենտրոնական հետախուզական վարչության տնօրեն Ուիլյամ Բըրնսի հետ:
«Զրույցի պատճառը հունիսի 24-ի իրադարձությունն էր [Եվգենի Պրիգոժինի ղեկավարած «Վագներ» մասնավոր ռազմական ընկերության զինված խռովության փորձը]: Բայց դա, երևի, ավելի շատ առիթ էր, որովհետև զրույցի հիմնական մասը նվիրված էր Ուկրաինայի թեմային: Մենք քննարկում էինք Ուկրաինայի խնդրի կարգավորման ուղիները», - հայտնել է Նարիշկինը:
