Պատրիարք Կիրիլը կոչ է արել պահպանել միասնականությունը և աջակցել Պուտինի ջանքերին՝ անկարգությունները կանխելու համար։
«Ընդհանուր սպառնալիքի դեմ անհրաժեշտ է պահպանել համախոհությունը, հաղթահարել վիրավորանքը և անձնական ամբիցիաները: Որքան էլ դա դժվար լինի: Ես աջակցում եմ Ռուսաստանի պետության ղեկավարի ջանքերին՝ ուղղված մեր երկրում խառնաշփոթը կանխելուն: Ինքս աղոթում եմ և կոչ եմ անում բոլոր եպիսկոպոսներին, հոգևորականներին, վանականներին և աշխարհականներին բարձրացնել իրենց հանդիսավոր աղոթքները, որպեսզի Տերը պահպանի անկարգության կոչերից վտանգված խաղաղությունն ու միասնությունը»,- ասվում է ռուս ուղղափառ եկեղեցու առաջնորդի հայտարարության մեջ։
Ինչպես ռուս պաշտոնյաները, այդ թվում՝ ՌԴ նախագահ Վլադիմիր Պուտինը, պատրիարք Կիրիլը ևս իր խոսքում չի հիշատակել ապստամբության անմիջական ղեկավար Եվգենի Պրիգոժինի անունը՝ տեղի ունեցողը որակելով բացառապես «մեր երկրում տարաձայնություն սերմանելու փորձ» և անկարգությունների սպառնալիք։
Անվտանգության դաշնային ծառայությունը քրեական գործ է հարուցել «Վագներ» մասնավոր ռազմական խմբավորման ղեկավար, Պուտինի երբեմնի խոհարար Եվգենի Պրիգոժինի դեմ`ռազմական հեղաշրջման կոչ հնչեցնելու համար:
Ինքը`Պրիգոժինը մեղադրում է Ռուսաստանի պաշտպանության նախարարությանը իր վարձկանների ուղղությամբ կրակ բացելու համար: Երեկ ուշ երեկոյան նա հայտարարել է, թե «արդարության երթ է սկսում» նախարարության դեմ`կոչ անելով ռուսաստանցիներին միանալ իրեն:
Վլադիմիր Պուտինն այդ քայլերն անվանեց խռովություն, դավաճանություն, հարված թիկունքին՝ իրավիճակը համեմատելով 1917 թվականի հոկտեմբերի հետ։
«Մենք բախվել ենք դավաճանության հետ, չափազանց հավակնությունները հանգեցրեցին դավաճանություն Ռուսաստանին»,- ասել է Պուտինը խոստանալով «անխուսափելի պատիժ»։
«Ցանկացած ներքին ցնցում մահացու սպառնալիք է մեր պետականության համար, մեր գործողությունները կոշտ են լինելու»,- խոստացել է նա։
