ՌԴ Պետդումայի պատգամավոր Սերգեյ Գավրիլովը չի բացառում առաջիկայում Ռուսաստանի և Վրաստանի միջև դիվանագիտական հարաբերությունների վերականգնումը։
«Կարծում ենք, որ ռուս - վրացական հարաբերությունների զարգացման հաջորդ քայլը կլինի դիվանագիտական հարաբերությունների վերականգնումը, դեսպանների փոխանակումը», - «Ռոսիյսկայա գազետա»-ի հետ զրույցում հայտարարել է ռուսաստանցի պատգամավորը՝ շեշտելով, որ նման քայլը հնարավոր է դառնում «ուկրաինական հարցում Վրաստանի զուսպ դիրքորոշման» շնորհիվ:
Անցած օրերին ՌԴ նախագահ Վլադիմիր Պուտինը չեղարկել է ռուսական ավիաընկերությունների համար դեպի Վրաստան թռիչքների արգելքը և Վրաստանի քաղաքացիների համար վիզային ռեժիմը։
Հարևան երկրների միջև ուղիղ ավիահաղորդակցությունը դադարեցնելու որոշում էր կայացրել Մոսկվան 2019 թվականի հունիսին՝ Վրաստանում պատգամավոր Գավրիլովի հետ կապված աղմկահարույց միջադեպին հաջորդած հակառուսական ցույցերի ֆոնին։
