Բռնակցված Ղրիմի Սիմֆերոպոլի մարզում հացահատիկով բեռնված վագոնները դուրս են եկել ռելսերից: Այս մասին նախ հայտնել էին Տելեգրամ ալիքները, ապա տեղեկությունը հաստատեց Ղրիմի՝ Ռուսաստանի կողմից նշանակված ղեկավար Սերգեյ Ակսյոնովը։
Նրա խոսքով՝ տուժածներ չկան: «Սիմֆերոպոլ-Սևաստոպոլ հատվածում էլեկտրագնացքների շարժումը դադարեցված է, ուղևորները կտեղափոխվեն ավտոբուսներով», - գրել է նա։
Ակսյոնովը ոչինչ չի ասել պայթյունի վերաբերյալ, ինչի մասին հայտնել են Baza, 112 և Mash Տելեգրամ ալիքները։ Դրանց փոխանցմամբ՝ միջադեպի հետևանքով հացահատիկով հինգ վագոն դուրս է եկել ռելսերից։ SHOT իշխանամետ հեռագրային ալիքը գրում է, որ Ղրիմում փնտրում են երկաթուղում դիվերսիա կատարելու մեջ կասկածվողի։
«Մենք Ռուսաստանի հետ ենք» շարժման նախագահ Վլադիմիր Ռոգովն ավելի ուշ գրել է, որ Չիստենկոյե գյուղի մոտ երկաթուղային գծերի տակ պայթուցիկ սարք է տեղադրվել, և պայթյունի հետևանքով վնասվել է ռելսերի 50 մետրը։
Ղրիմի երկաթուղին հայտարարել է, որ վագոնները գծերից դուրս են եկել «երկաթուղային տրանսպորտի աշխատանքին կողմնակի անձանց միջամտության պատճառով»։
