Ռուսաստանի կողմից բռնակցված Ղրիմի Սևաստոպոլ քաղաքում վառելիքի պահեստում պայթյուն է որոտացել, ըստ նախնական տեղեկությունների, անօդաչու թռչող սարքի հարվածի հետևանքով։
Քաղաքային իշխանության ղեկավար Միխայիլ Ռազվոժաևի փոխանցմամբ՝ հրդեհի մակերեսը կազմում մոտ հազար քառակուսի մետր, տուժածներ չկան, կրակը չի սպառնում քաղաքացիական օբյեկտներին։
Ռուս-ուկրաինական պատերազմի մեկնարկից ի վեր անօդաչու սարքերը բազմիցս հարվածներ են հասցրել բռնակցված Ղրիմում և Ռուսաստանի տարածքում գտնվող թիրախներին: Անցած փետրվարին դրոնի հարվածների հետևանքով ևս հրդեհ էր բռնկվել Տուապսեում նավթի պահեստում, մինչ այդ էլ նոյեմբերին՝ Բրյանսկի և Օրյոլի շրջանների նավթի պահեստներում։
