Երկկողմ և եռակողմ քննարկումների ինտենսիվ և կառուցողական շարքից հետո կողմերը զգալի առաջընթաց են գրանցել բարդ խնդիրների լուծման գործում, հայտարարել է Միացյալ Նահանգների պետքարտուղար Էնթոնի Բլինքենը՝ հինգշաբթի օրն ամփոփելով Արլինգթոնում Հայաստանի և Ադրբեջանի արտգործնախարարների քառօրյա բանակցությունները:
«Երկուսն էլ անկեղծ հանձնառություն դրսևորեցին հարաբերությունների կարգավորման և երկու երկրների միջև երկարատև հակամարտությունը դադարեցնելու հարցում», - ասել է Բլինքենը:
«Ե՛վ Հայաստանը, և՛ Ադրբեջանը սկզբունքորեն համաձայնել են որոշակի պայմանների և ավելի լավ են պատկերացնում միմյանց դիրքորոշումները չլուծված մնացող հարցերի վերաբերյալ։ Ես առաջարկել եմ նախարարներին վերադառնալ իրենց մայրաքաղաքներ՝ իրենց կառավարությունների հետ կիսելու այն հեռանկարը, որ հավելյալ բարի կամքի, ճկունության և փոխզիջումների դեպքում համաձայնությունը հասանելի է», - ընդգծել է ԱՄՆ պետքարտուղարը:
«Նրանք կշարունակեն ունենալ Միացյալ Նահանգների լիակատար աջակցությունն ու ներգրավվածությունը տևական և կայուն խաղաղություն ապահովելու իրենց ջանքերում», - վստահեցրել է Էնթոնի Բլինքենը։
Միացյալ Նահանգների արտաքին քաղաքական գերատեսչության ղեկավարը երեկ նաև ելույթ է ունեցել Արարատ Միրզոյանի և Ջեյհուն Բայրամովի հետ եռակողմ հանդիպմանը հաջորդած փակման լիագումար նիստում՝ հայտարարելով, որ Վաշինգտոնի արվարձանում անցկացված բանակցություններում «երկու կողմերը ի շարք շատ բարդ հարցեր և շոշափելի առաջընթաց են գրանցել կայուն խաղաղության համաձայնագրի ուղղությամբ»:
«Կարծում եմ՝ բանակցությունների տեմպը և մեր գործընկերների կառուցած հիմքը ցույց են տալիս, որ [խաղաղության] համաձայնագիրը իսկապես հասանելի է մեզ: Ցանկացած մարաթոնի վերջին մղոնը միշտ ամենադժվարինն է: Մենք դա գիտենք: Սակայն Միացյալ Նահանգներն այստեղ է՝ շարունակելու օգնել մեր երկու բարեկամներին հատել վերջնագիծը: Ես կարծում եմ, որ մենք շատ մոտ ենք դրան», - նշել է Բլինքենը:
Պետքարտուղարի կարծիքով՝ «թե՛ Ադրբեջանը և թե՛ Հայաստանն ընդունում են, որ տևական և կայուն խաղաղության միակ ճանապարհը երկխոսությունն է»:
Բլինքենի համոզմամբ՝ խաղաղության համաձայնության ձեռքբերումը «ոչ միայն պատմական իրադարձություն կլինի, այլ նաև կհամապատասխանի Ադրբեջանի և Հայաստանի ժողովուրդների շահերին և շատ դրական հետևանքներ կունենա նույնիսկ երկու երկրների սահմաններից դուրս»:
Մայիսի 1-4-ը Արլինգթոնում անցկացված բանակցություններից հետո Հայաստանի և Ադրբեջանի արտգործնախարարությունները միասնական հայտարարությամբ հանդես եկան, համաձայն որի՝ կողմերն «ունեցել են փոխըմբռնման առաջընթաց», բայց «մի շարք առանցքային հարցերի շուրջ դիրքորոշումները մնում են տարամետ»:
