2023 թվականից Հայաստանում կմեկնարկի պարտադիր առողջապահական ապահովագրության համակարգի ներդրումը, «Ազատության» հետ զրույցում ասաց առողջապահության նախարար Անահիտ Ավանեսյանը։
Նախապատրաստական փուլը կտևի մեկ տարի, իսկ 2024-ից, էտապային ձևով, կներառվեն քաղաքացիների խմբերը, նշեց նախարարը՝ շեշտելով՝ 2027-ից արդեն ողջ բնակչությունը պետք է ներառված լինի համընդհանուր ծածկույթի մեջ։
Մտահոգություններին, թե բժիշկները պոլիկլինիկաներից հիվանդներին չեն ուղղորդի հիվանդանոցներ, բուժումն էլ կլինի թերի, բայց ապահովագրության գումարները կգնան, նախարարն այսպես արձագանքեց․ -«Այն էտապները, որ մենք նախանշել ենք, մենք հստակ պատրաստ ենք լինելու էդ էտապներին արձագանքելու՝ թե՛ առաջնային օղակի խնդիրներին, թե՛ նաև հիվանդանոցային օղակի։ Հաջորդ տարվանից, օրինակ, 20 գյուղական ամբուլատորիաներ ամբողջովին վերակառուցվելու և վերզինվելու են։ Բացի դրանից, Արտաշատի, Գյումրու թիվ 1, թիվ 2 պոլիկլինիկան, Նոր Հաճնի, Վանաձորի թիվ 1 պոլիկլինիկան, Կապանի, Գորիսի, Վայքի պոլիկլինիկաներն արդեն ևս 23 թվականի կապիտալ ծախսերում ներառված են, լավագույն արդյունք ցուցաբերած բժիշկները կարող են մինչև 25 տոկոս իրենց աշխատավարձը բարձրացնել»։
Հարցին, թե աշխատող քաղաքացիների աշխատավարձից քանի՞ տոկոս է պահվելու, նախարարը պատասխանեց․ - «23 թվականին ամբողջությամբ կթարմացնենք ծառայությունների փաթեթի արժեքը և կձևավորենք ֆիքսված ապահովագրավճար, որը կլինի միանման բոլորի համար, բայց պետությունը համաֆինանսավորմամբ իր վրա կվերցնի բեռի մի մասը՝ ըստ եկամուտի չափի»։
Նախարարի հետ «Ֆեյսբուքյան ասուլիսն» ամբողջությամբ կարող եք դիտել ստորև․
