Չինաստանի նախագահ Սի Ծինպինը Հյուսիսային Կորեայի առաջնորդ Կիմ Չեն Ընին հայտնել է, որ Պեկինը ցանկանում է Փհենյանի հետ սերտորեն համագործակցել «հանուն տարածաշրջանային և համաշխարհային խաղաղության, կայունության և բարգավաճման»:
Ըստ Հյուսիսային Կորեայի կենտրոնական պետական լրատվական գործակալության հաղորդագրության՝ այդ մասին Չինաստանի ղեկավարը նշել է հյուսիսկորեացի պաշտոնակցին հասցեագրված նամակում:
Լրատվական գործակալության հաղորդագրությունում չի հիշատակվում Հյուսիսային Կորեայում հրթիռների փորձարկումների թեման:
Ի պատասխան վերջին ժամանակաշրջանում իրականացված աննախադեպ մեծ թվով փորձարկումների՝ Հարավային Կորեան և Միացյալ Նահանգները համատեղ զորավարժություններ են անցկացրել:
Հյուսիսային Կորեան նոյեմբերի 18-ին փորձարկել է Hwasong-17 տեսակի միջմայրցամաքային հրթիռը, դրա նախօրեին էլ սպառնացել է Վաշինգտոնին, թե հարկ եղած դեպքում «ջախջախիչ հարված կհասցնի»:
Հյուսիսային Կորեայի կենտրոնական պետական լրատվական գործակալությունը հայտարարել է, թե «Hwasong-17 հրթիռը միջուկային զսպման ամենահզոր ռազմավարական զենքն է աշխարհում»:
