Տանզանիայում ուղևորատար օդանավի երեկվա աղետի հետևանքով զոհվել է առնվազն 19 մարդ: Աղետը տեղի է ունեցել կիրակի օրը՝ տեղական ժամանակով մոտավորապես առավոտյան ժամը 9-ին:
Ինքնաթիռը հորդառատ անձրևի և փոթորկի պայմաններում պետք է վայրէջք կատարեր Բուկոբայի օդակայանում, սակայն ընկել է Վիկտորիա լիճը:
Առայժմ հայտնի չէ, թե ինչ պատճառով ATR 42 տեսակի ֆրանկո-իտալական արտադրության ինքնաթիռը չի կարողացել հասնել օդակայան:
Տանզանիայի ֆինանսական մայրաքաղաք Դար-Էս-Սալամից Բուկոբա չվերթն իրականացնող Precision Air ավիաընկերության օդանավում եղել է 39 ուղևոր և անձնակազմի 4 անդամներ:
Երկու օդաչուները վերապրել են աղետը և որոշ ժամանակ կապ են պահպանել փրկարարների հետ, սակայն թթվածնի պակասի հետևանքով մահացել են, նախքան փրկարարները կարողացել են հասնել լիճն ընկած ինքնաթիռին:
Տանզանիայի վարչապետ Կասիմ Մաջալիվան այցելել է վթարի շրջան: Նրա խոսքով, իշխանությունները փորձում են պարզել տուժածների և այս պահին անհետ կորած համարվող մարդկանց թիվը:
Նա ասել է, որ զոհվածների ամբողջական ցուցակը կհրապարակվի միայն այն բանից հետո, երբ անձի մահվան մասին պաշտոնական տեղեկությունը կփոխանցվի նրա ազգականներին և մտերիմներին:
