Այս շաբաթ Թեհրանում կմեկնարկեն վերջին շաբաթներին ծավալված բողոքի ցույցերի ընթացքում ձերբակալված շուրջ 1000 անձանց դատավարությունները։ Այսօր վկայակոչելով Իրանի դատական համակարգի ղեկավարներին՝ այս մասին տեղեկացրել է կիսապաշտոնական Tasnim գործակալությունը։
«Շուրջ հազար մարդ, որ մասնակցել է վերջին իրադարձությունների ընթացքում արձանագրված սաբոտաժի ակտերին, այդ թվում՝ անվտանգության աշխատակիցների սպանություններին և հանրային սեփականության հրկիզումներին, այս շաբաթ կկանգնի Հեղափոխական դատարանի առջև», - հայտարարել է Թեհրանի մարզային դատարանի նախագահը։
Նա նաև նշել է, որ դատավարությունները բաց կլինեն հանրության համար։
Իրավապաշտպանների տեղեկություններով՝ վերջին վեց շաբաթներին երկրի ողջ տարածքում ծավալված բողոքի ակցիաների ընթացքում 283 ցուցարար և անվտանգության ծառայության 34 աշխատակից է զոհվել։ Բողոքի ակցիաները Իրանում մեկնարկեցին սեպտեմբերի կեսերին, այն բանից հետո, երբ հայտնի դարձավ 22-ամյա Մահսա Ամինիի՝ ոստիկանական բաժանմունքում արձանագրված մահվան մասին։ Ամինին բերման էր ենթարկվել գլխաշոր կրելու կանոնները խախտելու համար։
