Վերջին օրերին ռուս խաղաղապահների պատասխանատվության գոտում ադրբեջանական զինուժի կողմից հրադադարի երեք խախտում է արձանագրվել, ինչի հետևանով «Լեռնային Ղարաբաղի զինված միավորման մեկ ներկայացուցիչ է վիրավորվել», հայտնում է Ռուսաստանի պաշտպանական գերատեսչությունը։
Այսօր երեկոյան հրապարակած տեղեկագրում նշվում է, որ խաղաղապահների հրամանատարությունը Ադրբեջանի կառավարության և հայկական կողմի ներկայացուցիչների հետ համագործակցությամբ իրավիճակը կարգավորել է։
«Շփման գծի փոփոխություն չի թույլատրվել»,- ասված է հաղորդագրությունում։ Առաքելությունը նաև տեղեկացնում է, որ «ռուս խաղաղապահների անվտանգությունը ապահովելու և հնարավոր նոր միջադեպերը կանխելու համար շարունական համագործակցություն է պահպանվում Հայաստանի և Ադրբեջանի զինված ուժերի գլխավոր շտաբերի հետ»։
Իրավիճակը երեկ առավոտվանից է լարվել։ Ըստ պաշտոնական հաղորդագրության՝ ադրբեջանական ստորաբաժանումները հյուսիսային ու հյուսիս-արևմտյան սահմանագոտու մի շարք հատվածներում փորձել էին հատել շփման գիծը։ Հայկական կողմը կասեցրել էր։ Բաքուն հերքել էր այս լուրը:
