Սեղանին ո՛չ ռուսական նոր դպրոց բացելու, ո՛չ անգամ ռուսական դպրոցներում դասարաններն ավելացնելու ծրագիր չկա. Կրթության նախարար

Ռուսաստանի արտգործնախարար Սերգեյ Լավրովի հայտարարությունից գրեթե 10 օր անց Կրթության նախարար Վահրամ Դումանյանն ասում է՝ հավանաբար պարոն Լավրովի խոսքերը լրագրողներն են սխալ մատուցում։

«Չեմ լսել ես անձամբ խոսքը, բայց մի քիչ, կարծում եմ, կարող է այլ ձևի է մատուցվում», - ասաց Դումանյանը:

Ավելի քան մեկ շաբաթ առաջ երևանյան ասուլիսի ընթացքում Ռուսաստանի արտգործնախարարը նորից էր խոսել Հայաստանում ռուսական դպրոցների մասին՝ նշելով. - «Հաշվի առնելով հայկական կողմի ցանկությունը, աշխատում ենք հանրապետությունում ավելացնել ռուսական դպրոցների քանակը, օգնում ենք բարձրացնել հայկական դպրոցների ռուսաց լեզվի ուսուցիչների որակավորումը»։

Դումանյանն ասում է՝ անձամբ ինքը Ռուսաստանի կառավարությանը չի դիմել, նաև տեղյակ է, որ որևէ պաշտոնական դիմում չկա, հակառակը տարօրինակ էլ կլիներ, եթե ցանկանային դպրոց բացել, կբացեին առանց ռուսական կողմին դիմելու։

«Եթե մենք հիմա ֆրանսերեն լեզվով դպրոց բացենք, դա չի նշանակում՝ Հայաստանի Հանրապետության կառավարությունը Ֆրանսիայի կառավարությանը դիմի, որ կլինի՞ մենք մեր մոտ ֆրանսերեն դպրոց բացենք: Դրա անհրաժեշտությունը չկա», - ընդգծեց Վահրամ Դումանյանը:

Նախարարը վստահեցրեց, որ սեղանին ո՛չ ռուսական նոր դպրոց բացելու, ո՛չ անգամ ռուսական դպրոցներում դասարաններն ավելացնելու ծրագիր չկա։ Ավելի վաղ փոխնախարար Ժաննա Անդրեասյանը պատմել էր, որ ուշադիր են նաև Հայաստան եկած ռուսների նկատմամբ, եթե ռուսալեզու դասարանների պահանջարկ լինի նրանց համար, կմտածեն դրա մասին, առայժ ամեն ինչ մնում է նույնը։ Չի փոխվելու նաև հանրակրթական դպրոցներում ռուսերենի ու մյուս օտար լեզուների դասաժամերի քանակը, որոնք գործող կարգավորումներով բաշխվում են ըստ դպրոցի նախապատվության՝ ավելի շատ ռուսերենի՞ն, թե՞ մեկ այլ օտար լեզվի դասաժամեր հատկացնելը։

«Բարդագույն պրոցես է, այդպիսի մեկ հրամանով հնարավոր չի դարձնենք այսքան ժամ, է դարձրեցինք, բաց ո՞վ պիտի դասավանդի, ինչպե՞ս պիտի դասավանդի, ուսուցիչները ինչպես պետք է վերապատրաստվեն: Դա բարդագույն պրոցես է և միջոցներ է պահանջում: Հիմա եթե X երկիր ցանկություն ունի իր լեզուն մեզ մոտ պոպուլյարիզացնի ու դա չի հակասում մեր ընդհանուր մոտեցումներին, ինչո՞ւմ է հարցը», - ասաց նախարարը:

Ամեն դեպքում խորհրդային անցյալ ունեցող Հայաստանում պարբերաբար թեժանում է ռուսերենի դասաժամերի կամ ռուսական դպրոցների ավելացման թեման՝ առաջ բերելով թեժ քննարկումներ, թե ինչո՞ւ պետք է ռուսերեն երեխաներն ավելի լավ սովորեն, քան, օրինակ, անգլերեն, որը ողջ աշխարհում ավելի տարածված լեզու է:

Մասնագետի կարծիքով՝ Հայաստանում պետք է հիմնովին վերանայվեն օտար լեզուների ուսուցման ծրագրերը

Աննա Խաչատրյանը մանկավարժ-հոգեբան է։ Մինչ օրս մասնագիտական ու շատ այլ գրքեր կարդում է ռուսերեն կամ անգլերեն։ Չնայած վերջին տարիներին տարբեր հրատարակչություններ տասնյակ գրքեր են թարգմանում հայերեն ու տպագրում, միևնույնն է, հայերեն թարգմանությունները մի կաթիլ են ծովում։ Ըստ Աննայի, Հայաստանի նման երկրում ապրելիս օտար լեզվի տիրապետելը գրեթե պարտադիր է։

«Ինչպես են անցնում 10 տարին ռուսերենը, ինչ մակարդակի վրա է մատուցվում բալիկներին, շատ քչերն են, որ լավ բազայով, կապ չունի հայկական դպրոց են գնում, թե ռուսական թեքումով դպրոց են գնում, կարողանում են, միգուցե շատ պետք է տանը կարդան: Դպրոցը միշտ էլ բավարար չի լինում, չէ՞, իրականում շատ գիտելիք ստանալու համար», - ընդգծեց Աննան:

Այնինչ դպրոցներում ռուսերենին ու անգլերենին քիչ դասաժամեր չեն հատկացվում, մայրենիից մի փոքր պակաս, արդյունքում, միևնույնն է, երեխաների մեծ մասը դպրոցից հեռանում են չունենալով միջազգային չափանիշներով՝ B2՝ միջինց բարձր մակարդակի օտար լեզվի, այդ թվում՝ ռուսերենի գիտելիք։

Աննա Խաչատրյանի կարծիքով՝ Հայաստանում պետք է հիմնովին վերանայվեն օտար լեզուների ուսուցման ծրագրերը, այդ թվում՝ ռուսերենի. - «Մոտեցումը, որը ճիշտ դրված է լինում դպրոցում, որ դա չոր միայն դասագրքային, երեխաները չեն գնում անգիր անում վերադառնում ու վերարտադրում, այդ ամրապնդումը տարբեր մեթոդներով պետք է արվի: Միգուցե ավելի մատչելի պետք է դարձնել՝ ոնց բալիկը ավելի շուտ յուրացնի: Իմ կարծիքով՝ շատ են սեղմում դպրոցական դասագրքերը: Դա կարելի է անել հեքիաթների ձևով, կարելի է անել թանգարան հաճախելու ձևով, կարելի անել ֆիլմի դիտումների ձևով»:

Չնայած օտար լեզուների ուսուցման նոր ու արդյունավետ մեթոդների առկայությանը, ըստ մասնագետի, Հայաստանում հիմա օտար լեզուներ դպրոցներում շարունակում են սովորեցնել այնպես, ինչպես օրինակ, 15 կամ 20 տարի առաջ, չեն թարմացվել անգամ դասագրքերի նկարները, բառապաշարը։