Եվրոպական ուղևորությունն ավարտող Միացյալ Նահանգների նախագահ Ջո Բայդենն այսօր Վարշավայում՝ Թագավորական ամրոցում ունեցած ելույթում աննախադեպ սուր քննադատության է ենթարկել Ռուսաստանի նախագահ Վլադիմիր Պուտինին:
«Ռուսաստանը երբեք չի հաղթի Ուկրաինայում, որովհետև ազատ մարդիկ հրաժարվել են ապրել անհուսության և խավարի աշխարհում: Մենք ունենք ուրիշ՝ ավելի լուսավոր և դեմոկրատիայի վրա հիմնված ապագա», - ասել է Բայդենը:
Միացյալ Նահանգների ղեկավարը հայտարարել է, որ ամերիկյան զորքերը Եվրոպայում են գտնվում ՆԱՏՕ-ի դաշնակիցներին պաշտպանելու, այլ ոչ թե ռուսական զինված ուժերի հետ առճակատվելու նպատակով: Բայդենի խոսքով՝ պաշտպանական դաշինքը երբեք չի փորձել խախտել Ռուսաստանի սահմանները:
ԱՄՆ նախագահն ասել է, որ Ռուսաստանը չի կարողանա հասնել այն նպատակներին, որոնք ծրագրել է փետրվարի 24-ին Ուկրաինայի վրա հարձակվելիս:
Բայդենն ընդգծել է, որ ամերիկյան զորամիավորումները մտադիր չեն ուղիղ ներքաշվել այս պատերազմում: Միաժամանակ, ԱՄՆ նախագահը Պուտինին նախազգուշացրել է՝ կոչ անելով զերծ մնալ որևէ պարագայում ՆԱՏՕ-ի անդամ երկրների վրա հարձակվելու մտադրությունից:
«Չմտածեք նույնիսկ մեկ սանտիմետրով հատել ՆԱՏՕ-ի սահմանը: ՆԱՏՕ-ի Կանոնադրության 5-րդ հոդվածը դաշինքի անդամների վրա դրել է մեր հսկայական հավաքական կարողությամբ ՆԱՏՕ-ի տարածքի ամեն մի սանտիմետրը վճռականորեն պաշտպանելու սրբազան պարտավորություն»,- ասել է Բայդենը:
Նա դիմել է նաև ռուս ժողովրդին՝ վստահեցնելով, որ ՆԱՏՕ-ն երբեք չի եղել նրա թշնամին: Նա ասել է, որ Ռուսաստանի ժողովուրդը հիշում է անցյալի սարսափները, և հիմա Ուկրաինայի ժողովուրդն է ենթարկվում այն տառապանքներին, որոնց ժամանակին ենթարկվել են ռուսները:
Բայդենի խոսքով, ռուսներից շատերը համաձայն չեն Կրեմլի քաղաքականությանը: Այս շաբաթների ընթացքում մոտ 200 հազար ռուսաստանցի է հեռացել երկրից, և նրանք մտավոր մեծ կարողություն ունեցողներն են, ովքեր դեմ են պատերազմին:
ԱՄՆ նախագահի խոսքով՝ դեմոկրատիայի համար պայքարը չէր կարող ավարտվել «սառը պատերազմի» ավարտի հետ: Անցած 30 տարում ավտորիտարիզմի ուժերը գլուխ են բարձրացրել ամբողջ աշխարհում:
«Հարկ է հստակ գիտակցել, որ այս ճակատամարտում հաղթանակ չի ապահովվի ոչ առաջիկա օրերին, ոչ էլ ամիսներին: Մենք պետք է պատրաստվենք երկարատև պայքարի», - ասել է Ջո Բայդենը:
Իր ուղերձում Միացյալ Նահանգների նախագահը նշել է, որ այս պատերազմը նախաձեռնած Պուտինն այլևս չի կարող մնալ իշխանության:
«Բայդենը չէ, որ պետք է որոշի, թե ով է ղեկավարելու Ռուսաստանը»
Կրեմլի խոսնակ Դմիտրի Պեսկովն անմիջապես արձագանքել է, թե «Ռուսաստանի նախագահին ժողովուրդն է ընտրում, և Բայդենը չէ, որ պետք է որոշի, թե ով է ղեկավարելու Ռուսաստանը»:
Սպիտակ տունը պարզաբանել է, որ Բայդենը Ռուսաստանում իշխանափոխության կոչ չի արել, այլ ընդգծել է, որ «այդ մարդուն [Պուտինին] չի կարելի տալ հարևաննների և տարածաշրջանի վրա իշխանություն իրականացնելու հնարավորություն»:
