ՄԱԿ-ի տվյալներով՝ ուկրաինացիների գրեթե մեկ քառորդը լքել են իրենց տները կամ երկիրը, ռուսական բանակի ռազմական գործողություններն Ուկրաինայում առաջացրել են Երկրորդ համաշխարհային պատերազմից ի վեր ամենալուրջ միգրացիոն ճգնաժամը Եվրոպայում։
2022 թվականի սկզբին Ուկրաինայում ապրում էր 41 միլիոն մարդ։ Նրանցից ավելի քան 3 միլիոնը, ըստ ՄԱԿ-ի, մեկնել է արտերկիր։ 6,5 միլիոն մարդ տեղափոխվել է երկրի ներսում ավելի ապահով տարածքներ:
Ռուսական ներխուժման սկզբից ի վեր զոհվել է ավելի քան 900 մարդ, այդ թվում՝ 75 երեխա։ Մոտ 1500 խաղաղ բնակիչ վիրավորվել է։
Դոնբասի ինքնահռչակ հանրապետություններում ռազմական գործողության ընթացքում զոհվել է մոտ 200 խաղաղ բնակիչ, ավելի քան 500-ը՝ վիրավորվել։
ՄԱԿ-ի Մարդու իրավունքների գրասենյակը պնդում է, որ խաղաղ բնակիչների մեծ մասը զոհվել է ծանր հրետանու, հրթիռային և օդային հարվածների հետևանքով։ Զոհերի իրական թիվը կարող է շատ ավելի մեծ լինել, քանի որ ինտենսիվ մարտերի շրջաններում զոհվածների մասին տվյալները գալիս են ուշացումով: ՄԱԿ-ի առաքելությունները չեն կարող այցելել այն վայրերը, որտեղ մարդիկ են զոհվել, և այնտեղ զրուցել զոհերի հարազատների և ականատեսների հետ:
Վիճակագրական տվյալները հիմնված են բաց աղբյուրների տվյալների վրա, որոնք միշտ չէ, որ հնարավոր է ստուգել պատերազմական պայմաններում:
Հնարավոր չէ նաև ասել ռուսական կողմի կորուստների մասին։ Պենտագոնի տվյալներով՝ պատերազմի 25 օրերի ընթացքում զոհվել է շուրջ 7 հազար ռուսաստանցի զինվորական, ռուսական կողմն իր զոհերի մասին տվյալներ հրապարակել է միայն մեկ անգամ՝ մոտ երկու շաբաթ առաջ։
Պատերազմում զոհվում են նաև բարձրաստիճան զինվորականներ։ Այսպես, երեկ հայտնի դարձավ, որ Մարիուպոլի մերձակայքում տեղի ունեցած մարտերի ժամանակ զոհվել է Ռուսաստանի Սևծովյան նավատորմի հրամանատարի տեղակալ Անդրեյ Պալիյը։ Նրա մասին տեղեկությունը հայտնել են Սևաստոպոլի նահանգապետ Միխայիլ Ռազվոզժաևը և սենատոր Եկատերինա Ալտաբաևան։ Պալիյը մեկն էր այն մի քանի բարձրաստիճան ռուս զինվորականներից, որոնք զոհվել են այս պատերազմում: Ուկրաինական կողմը, մասնավորապես, պնդում է, որ պատերազմի սկզբից ի վեր արդեն հինգ ռուս գեներալ է զոհվել, Մոսկվան այս տեղեկությունը չի մեկնաբանում։
