Արցախի Պաշտպանության բանակը հերքում է Ադրբեջանի պաշտպանության նախարարության հաղորդագրությունը, թե ՊԲ ստորաբաժանումները կրակ են բացել արևելյան ուղղությամբ տեղակայված ադրբեջանական դիրքերի ուղղությամբ՝ այն որակելով կեղծ և իրականության հետ առնչություն չունեցող։
«Իրականում նշված ուղղություններում վերջին օրերի ընթացքում հրադադարի պահպանման ռեժիմը պարբերաբար խախտվել է ադրբեջանական զինուժի կողմից, որի վերաբերյալ համապատասխան տեղեկատվություն է տրամադրվել ռուսական խաղաղապահ զորակազմի հրամանատարությանը: Ադրբեջանական կողմից նշված խախտումների արդյունքում ՊԲ-ի ստորաբաժանումները կորուստներ չեն կրել», - փոխանցում է Արցախի ՊԲ-ը։
Ադրբեջանի պաշտպանության նախարարությունն այսօր առավոտյան տարածած հաղորդագրությամբ պնդել էր, թե անցած մեկ օրվա ընթացքում 23 անգամ գնդակոծվել են ադրբեջանական բանակի դիրքերը Գերանբոյի, Թերթերի, Աղդամի և Խոջալուի ուղղություններում։
