Պատերազմ Ուկրաինայում (լայվ բլոգ, թարմացվող)

Մարիուպոլ քաղաքի շրջափակումը կավարտվի այսօր, քաղաքը օղակի մեջ կվերցվի, հայտարարել է Դոնեցկի ինքնահռչակ հանրապետության միլիցիայի վարչության պետի տեղակալ Էդուարդ Բասուրինը։

«Ամեն ինչ պետք է անել, որպեսզի խաղաղ բնակչությունը չտուժի։ Ի դեպ, սննդի հետ կապված շատ մեծ խնդիր կա: Սա պետք է ինչ-որ կերպ կարգավորել և փորձել հնարավորինս արագ ապաշրջափակել քաղաքը, մարդասիրական միջանցք ստեղծենք, որպեսզի խաղաղ բնակիչները կարողանան դուրս գալ», - ասել է Բասուրինը։

Պաշտոնական Անկարան վճռական է՝ կիրառել Մոնտրոյի կոնվենցիայի դրույթները և փակել Բոսֆորի ու Դարդանելի նեղուցները ռուսական և ուկրաինական ռազմական նավերի համար, հայտարարել է Թուրքիայի նախագահը:

«Մենք վճռական ենք՝ կիրառել Մոնտրոյի կոնվենցիայով նեղուցներում նավերի երթևեկության հարցում մեզ տրված լիազորությունները, որպեզի կանխենք ճգնաժամի խորացումը: Ինչպես մշտապես ասել ենք, կողմ ենք Ուկրաինայի ինքնիշխանությանը, քաղաքական միասնությանն ու տարածքային ամբողջականությանը: Մենք անընդունելի ենք համարում Ռուսաստանի հարձակումը Ուկրաինայի տարածքների նկատմամբ, ողջունում ենք Ուկրաինայի ղեկավարության ու ժողովրդի մղած պայքարը», - հայտարարել է Ռեջեփ Թայիփ Էրդողանը նախօրեին կառավարության նիստից հետո:

Վաշինգտոնը նախազգուշացրել է Ռուսաստանի կողմից Ուկրաինայի մայրաքաղաքի վրա հարձակումների երկրորդ հնարավոր փորձի մասին։

Maxar ընկերության արբանյակային լուսանկարները վկայում են, որ դեպի Կիև ռուսական ռազմական տեխնիկայի 65 կիլոմետր երկարությամբ շարասյուն է շարժվում՝ զրահատեխնիկա, տանկեր, քարշակային հրետանի և բեռնատարներ։

Ամերիկացի սենատոր Քրիս Մերֆին Թվիթերում գրել է, որ ռուսական զորքերը կփորձեն շրջապատել և կտրել Կիևը առաջիկա շաբաթների ընթացքում: «Քաղաքի համար պայքարը երկար և արյունալի է լինելու, ուկրաինացիներն արագ պատրաստվում են փողոցային կռիվների», - գրել է սենատորը։

Ռուսական բանակը կշարունակի հատուկ ռազմական գործողությունը Ուկրաինայում մինչև իր առջև դրված նպատակներին հասնելը, հայտարարել է Ռուսաստանի պաշտպանության նախարարը։

Մոսկվայի հիմնական խնդիրը, Սերգեյ Շոյգուի խոսքով, Արևմուտքի ռազմական սպառնալիքից Ռուսաստանը պաշտպանելն է։

Ռուսաստանի ռազմական գերատեսչությունը պնդում է, որ ուկրաինական կողմը խաղաղ բնակիչներին օգտագործում է որպես կենդանի վահան։

Ռուսաստանի արտգործնախարար Սերգեյ Լավրովն էլ հայտարարել է, որ Ուկրաինայում ստեղծված իրավիճակը Կիևի «հանցավոր ռեժիմին արևմտյան երկրների թողտվության» արդյունքն է։ Նաև, ըստ նրա, Եվրոպան երկխոսության փոխարեն ընտրել է «ոչ լեգիտիմ պատժամիջոցների» ճանապարհը։ Լավրովի խոսքով՝ Արևմուտքը պատրաստակամություն չի ցուցաբերում Ռուսաստանին անվտանգության երաշխիքներ տրամադրելու և ՆԱՏՕ-ի ընդլայնումից հրաժարվելու հարցում։

ՄԱԿ-ի Մարդու իրավունքների խորհրդի նիստի ընթացքում Լավրովի հեռավար ելույթի ժամանակ մի խումբ դիվանագետներ, այդ թվում՝ Միացյալ Նահանգներից, Եվրամիությունից և Մեծ Բրիտանիայից, ցուցադրաբար լքել են նիստերի դահլիճը։

Մյունխենի քաղաքապետ Դիթեր Ռեյթերը հայտարարել է Մյունխենի ֆիլհարմոնիկ նվագախմբի գլխավոր դիրիժոր, ռուս երաժիշտ Վալերի Գերգիևի պաշտոնանկության մասին։

Ռուսաստանի նախագահ Վլադիմիր Պուտինի հետ մտերիմ հարաբերություններով հայտնի երաժիշտը հրաժարվել է հստակ, միանշանակ և անվերապահորեն դատապարտել Ռուսաստանի ներխուժումը Ուկրաինա, պարզաբանել է Գերգիևի գործատուն։

68-ամյա Գերգիևը Ռուսաստանի ժողովրդական արտիստ է, արժանացել է աշխարհի տարբեր երկրների բազմաթիվ պարգևների ու ամենաբարձր կոչումների, աշխատել է առաջատար նվագախմբերի հետ։

Ուկրաինան հետ է կանչում Ղրղըզստանում և Վրաստանում իր դեսպաններին։ «Մեզ օգնել ցանկացող կամավորներին խոչընդոտելու, պատժամիջոցների հարցում ոչ բարոյական դիրքորոշման պատճառով», - պարզաբանել է Ուկրաինայի նախագահ Վլադիմիր Զելենսկին Եվրախորհրդարանի արտահերթ նիստում իր հեռավար ելույթի ընթացքում։

Ուկրաինա Ռուսաստանի ներխուժումից հետո Վրաստանի վարչապետ Իրակլի Ղարիբաշվիլին հայտարարել էր, որ Թբիլիսին չի պլանավորում միանալ Մոսկվայի դեմ Արևմուտքի տնտեսական և ֆինանսական պատժամիջոցներին, նաև բացառել էր, որ կուղևորվի Կիև՝ աջակցություն հայտնելու ուկրաինացի ժողովրդին։

Վրաստանի առաջնորդի այս հայտարարությունները երկրում աննախադեպ բողոքի ցույցեր են հարուցել, որի մասնակիցները պահանջում են Ղարիբաշվիլիի հրաժարականը:

Ռուսաստանը պարտավոր է անհապաղ դուրս բերել իր զորքերն ու դադարեցնել արյունահեղությունն Ուկրաինայում, այսօր հայտարարել է Գերմանիայի կանցլերը։ Օլաֆ Շոլցը զգուշացրել է, որ հակառակ դեպքում Մոսկվայի դեմ կսահմանվեն նոր պատժամիջոցներ։

«Ուկրաինան բառացիորեն կենաց-մահու կռիվ է տալիս»,- ասել է նա։