Թուրքիայի նախագահ Ռեջեփ Էրդողանը սեպտեմբերի 4-ին Սոչիում հանդիպելու է Ռուսաստանի նախագահ Վլադիմիր Պուտինին՝ քննարկելու հացահատիկի գործարքն ու Ուկրաինայի հակամարտությունը։ Այս մասին հաղորդում է Reuters գործակալությունը՝ վկայակոչելով թուրքական երկու տարբեր աղբյուրներ։
Այսօր մեկնարկում է Թուրքիայի արտգործնախարար Հաքան Ֆիդանի երկօրյա այցը Մոսկվա։ Նա բանակցելու է Ռուսաստանի իր գործընկեր Սերգեյ Լավրովի հետ։
Հանդիպման հիմնական հարցերից մեկը վերաբերելու է հացահատիկի արտահանման այլընտրանքային գործարքին։ «Ռուսաստանի և Թուրքիայի արտգործնախարարները մտադիր են քննարկել Ռուսաստանի նախագահ Վլադիմիր Պուտինի առաջարկը կյանքի կոչելու պարամետրերը», - հաղորդում է Ռուսաստանի արտգործնախարարությունը։ Պուտինի նախաձեռնությունը ենթադրում է զեղչված գներով, Կատարի ֆինանսավորմամբ, 1 միլիոն տոննա ռուսական հացահատիկի առաքում Թուրքիա՝ թուրքական ձեռնակություններում այն մշակելու և ավելի կարիքավոր երկրներ մատակարարելու համար։ Մոսկվան այդ ծրագիրը դիտարկում է որպես սևծովյան գործարքին օպտիմալ այլընտրանք:
Լավրովն ու Ֆիդանը նաև մտքեր են փոխանակելու ուկրաինական ճգնաժամի իրավիճակի շուրջ, քննարկելու են քաղաքական-դիվանագիտական կարգավորման հնարավոր ուղիները, շոշափվելու է հումանիտար թեման, մասնավորապես՝ գերիների փոխանակման վերաբերյալ:
«Ռուսական կողմը նաև պլանավորում է բարձրացնել Անկարայի և Կիևի միջև ռազմատեխնիկական համագործակցության զարգացման կործանարարության թեման», - նշված է հանդիպումից առաջ Ռուսաստանի արտգործնախարարության տարածած հաղորդագրությունում։
Ռուսաստանի միանգամից 5 շրջաններ ենթարկվել են անօդաչու թռչող սարքերի զանգվածային հարձակման, Պսկովի օդանավակայանում ռազմատրանսպորտային օդանավեր են ոչնչացվել, իսկ Ուկրաինայի վրա ռուսական ուժերի հրթիռակոծության հետևանքով Կիևում երկու մարդ է զոհվել։
Պատերազմի սկզբից ի վեր անցած գիշերվա հարձակումը Ռուսաստանի վրա անօդաչուների ամենազանգվածային հարձակումն էր։ Կրեմլի մամուլի խոսնակն ասել է, որ Վլադիմիր Պուտինին զեկուցվել է հարձակման մասին, նշելով, որ գլխավոր և գերագույն հրամանատարը մշտապես և օպերատիվ ստանում է ողջ տեղեկատվությունը։
Դիմտրի Պեսկովը ահաբեկչություն է որակել դրոնների հարձակումը։ Փաստորեն, երբ Ռուսաստանն է հրթիռներով, դրոններով ու ավիացիայով ռմբակոծում Ուկրաինային, ՄԱԿ-ի տվյալներով՝ միայն խաղաղ բնակիչների զոհերի թիվը մոտենում է 9,5 հազարի՝ Ռուսաստանը դա «հատուկ ռազմական գործողություն» է կոչում, իսկ ուկրաինական հարձակումները՝ ահաբեկչություն։
«Իսկապես շարունակվում է Կիևի ռեժիմի ահաբեկչական ակտիվությունը, անօդաչուների գերակշիռ մեծամասնությունը թռչում է քաղաքացիական օբյեկտների վրա։ Մենք շարունակում ենք և կշարունակենք հատուկ ռազմական գործողությունը, որպեսզի արմատախիլ անենք նման սպառնալիքները մեզ համար»,- այսօր ասել է Կրեմլի խոսնակը։
Իսկ Արտգործնախարարության խոսնակ Մարիա Զախարովան հայտարարել է, որ ուկրաինական անօդաչուների հարձակումն «անպատիժ չի մնա»։
Նախնական տեղեկություններով՝ Ռուսաստանում մարդկային զոհեր չկան։
ԱՄՆ-ը հայտարարել է Ուկրաինային 250 միլիոն դոլարի լրացուցիչ ռազմական օգնության նոր փաթեթի մասին, որը ներառում է զինամթերք, սարքավորումներ և պահեստամասեր, ինչպես նաև անձնակազմի վերապատրաստում։
«Այսօր մենք հայտարարում ենք ռազմական օգնության հաջորդ փաթեթի մասին, որը կօգնի Ուկրաինային պաշտպանել իր տարածքը և իր ժողովրդին: Այս փաթեթը պարունակում է կարևոր հնարավորություններ, որոնք կօգնեն Ուկրաինային մարտի դաշտում», - ասել է Միացյալ Նահանգների պետքարտուղար Էնթոնի Բլինքենը երեքշաբթի օրը Պետդեպարտամենտի կայքէջում հրապարակված հայտարարությունում:
2022 թվականի փետրվարին ռուսական ներխուժման սկզբից ի վեր Ուկրաինան ԱՄՆ-ից արդեն ստացել է ավելի քան 43 միլիարդ դոլարի օգնություն:
Այս գիշեր անօդաչու թռչող սարքերի հարձակում է եղել Ռուսաստանի հինգ շրջանների և Ղրիմի Սևաստոպոլ քաղաքի վրա:
Կեսգիշերն անց Պսկովի նահանգապետը հայտնել է, որ քաղաքի օդանավակայանի վրա անօդաչու թռչող սարքի հարձակումը հետ է մղվել, զոհեր և վիրավորներ չկան։ Հրդեհ է բռնկվել՝ չորս Իլ-76 ինքնաթիռ է վնասվել:
ՌԴ պաշտպանության նախարարությունը հայտնել է երեք անօդաչու թռչող սարքի ոչնչացման մասին Բրյանսկի մարզում, մեկի՝ Օռլովսկի շրջանում։
Գերատեսչությունը հայտնել է նաև Ռյազանի և Կալուգայի շրջաններում խոցված անօդաչու թռչող սարքերի մասին:
ՌԴ պաշտպանության նախարարությունը հաղորդում է, որ Սևծովյան նավատորմի ավիացիան ոչնչացրել է 4 մոտորանավակ Ուկրաինայի Զինված ուժերի դեսանտային խմբերով՝ մինչև 50 հոգի:
Կիևում և Կիևի մարզում գիշերը պայթյուններ են լսվել։ Կիևում հրթիռակոծության հետևանքով երկու մարդ է զոհվել, հայտնում են Ուկրաինայի մայրաքաղաքի իշխանությունները։
Քաղաքի Շևչենկովսկի շրջանում բեկորներ են ընկել վարչական շենքի վրա, երկու մարդ մահացել է, ևս երկուսը հոսպիտալացվել են, հայտնել է Կիևի քաղաքապետ Վիտալի Կլիչկոն։
Ավելի ուշ Կիևի քաղաքային ռազմական վարչությունը պարզաբանել է, որ զոհվել է երկու պահակ։
Ավելի վաղ հաղորդվել էր Օդեսայում, ինչպես նաև Կրիվոյ Ռոգում և Չերկասկի շրջանում պայթյունների մասին։ Կիևի մարզում վեց առանձնատուն է վնասվել, հայտնել են ոստիկանությունից։ Ամբողջ Ուկրաինայում օդային տագնապ էր հայտարարվել։
Օգոստոսի 30-ի գիշերը Ուկրաինայի տարածքում ռուսական հարձակման ժամանակ բոլոր 28 թևավոր հրթիռները և 16 հարվածային անօդաչու թռչող սարքերից 15-ը խոցվել են, ասել է Ուկրաինայի Զինված ուժերի գլխավոր հրամանատար Վալերի Զալուժնին։
Ռուսական ուժերի հարձակումների մասին Ռուսաստանի պաշտպանության նախարարության կայքում տեղադրված օրվա ամփոփագրում նշված է, որ Դոնեցկի մարզում ռազմամթերքով բեռնված գնացք է ոչնչացվել. - «Դարոժնոյե բնակավայրի բեռնաթափման կայարանում հրթիռային հարված է հասցվել հրետանային զինամթերքով ռազմական գնացքին։ Բացի այդ, Դրուժկովկա բնակավայրի մոտ ոչնչացվել է ուկրաինական բանակի 93-րդ մեքենայացված բրիգադի զինամթերքի պահեստը»։
Ռուսաստանի ՊՆ-ը նաև հայտնում է, որ Կուպյանսկի ու Կրասնի Լիմանի ուղղություններում հետ են մղել ուկրաինական մի շարք գրոհներ, ուկրաինական բանակի կենդանի ուժի ու զինտեխնիկայի կորուստների թվեր են հրապարակվել և՛ անցած մեկ օրվա կտրվածքով, և՛ ամբողջ պատերազմի։
Ուկրաինայի գլխավոր շտաբի մամուլի խոսնակն այսօր ասաց, որ ուկրաինական զորքերը Վերբովո գյուղի ուղղությամբ հաջողություն են ունեցել և ամրանում են ձեռք բերված բնագծերում։ Վերբովո գյուղն ընկած է Ռաբոտինոյից հարավ-արևելք, որն ազատագրելու մասին ուկրաինական կողմը նախօրեին էր հայտարարել, բայց ռուսական կողմը Ռաբոտինոն կորցնելու լուրերը չի հաստատում:
Օգոստոսի 29-ը Ուկրաինայում երկրի անկախության, ինքնիշխանության, տարածքային ամբողջականության համար ընկածների հիշատակի օրն է։ Նախագահ Վլադիմիր Զելենսկին այսօր ծաղիկներ է դրել Ուկրաինայի պաշտպանների հուշարձանին, որը զոհվածների լուսանկարներով պատ է։
«Յուրաքանչյուր տարի մենք հարգանքի տուրք ենք մատուցում ուկրաինացի տղամարդկանց, ուկրաինացի կանանց, որոնք իրենց կյանքն են տվել՝ պաշտպանելու մեր երկիրը։ Պաշտպանելու Ուկրաինայի անկախությունը, մեր ժողովրդի ազատությունը, Ուկրաինայի ամբողջականությունը։ Ուկրաինայի իրավունքն է լինել ազատ երկրների շարքում», - ասել է Զելենսկին, իսկ սոցցանցերում նա գրել է․ - «Բառերը երբեք բավարար չեն՝ արտահայտելու ինչ մենք զգում ենք»։
Եվ հենց այսօր, պաշտպանների հիշատակի օրը Ռուսաստանի գրաված տարածքներից Ուկրաինա են տեղափոխվել ևս 84 զոհված զինծառայողների մարմիններ։ Սովորաբար զոհվածների մարմինների կամ գերիների փոխանակումներ տեղի են ունենում երկկողմ պայմանավորվածություններով, բայց այս պահին որևէ այլ մանրամասներ չեն հաղորդվում։ Միայն նշվում է, որ գործողությունը կատարվել է Ժնևյան կոնվենցիայի նորմերին համապատասխան։ Զոհվածների ինքնությունը պարզելուց հետո, մարմինները կփոխանցվեն հարազատներին՝ պատշաճ կարգով հուղարկավորելու համար։
Ռուսաստանի պաշտպանության նախարարությունը հայտնել է Տուլայի շրջանի երկնքում այս գիշեր երկու ինքնաթիռի տիպի անօդաչու թռչող սարքերի խոցման մասին։
Ավելի վաղ ՌԴ պաշտպանության նախարարությունը հայտնել էր Բելգորոդի շրջանի երկնքում երկու անօդաչու թռչող սարքի խոցման մասին։