Վլադիմիր Զելենսկին ուկրաինական հեռուստամարաթոնի եթերում երեկ կրկին պնդել է երկրի տարածքային ամբողջականության վերականգնումը 1991 թվականի սահմաններում։ Միևնույն ժամանակ, Զելենսկու խոսքով, եթե ուկրաինական բանակը հասնի Ղրիմի հետ վարչական սահմանին, ապա հնարավոր կլինի «քաղաքականորեն ավարտել Ռուսաստանի ապառազմականացումը թերակղզու տարածքում»։
Միաժամանակ, Ուկրաինայի նախագահն ասել է, որ ռազմական գործողությունները ռուսական տարածք տեղափոխելը ռիսկային է՝ նկատի ունենալով ռուսական տարածքին արևմտյան զենքով չհարվածելու արևմտյան գործընկերների պահանջը:
Ուկրաինայի նախագահն ընդգծել է, որ անհրաժեշտության դեպքում երկիրը պատրաստ է «երկար ժամանակ» պատերազմել, բայց մտածված պատերազմ վարել՝ նվազագույնի հասցնելով կորուստները։
Խոսել է երեկ Զելենսկին նաև կոռուպցիայի և նախագահական ընտրությունների մասին։ Նա նախ կոչ է արել ռազմական դրության ժամանակ կոռուպցիան նույնացնել պետական դավաճանության հետ, սակայն հավելել է, թե խոսքը մահապատժի մասին չէ։
Ուկրաինայի նախագահ Վլադիմիր Զելենսկին կոչ է անում արևմտյան դաշնակիցներին 5 միլիարդ դոլար տրամադրել հաջորդ տարվա գարնանը նախատեսված նախագահական ընտրությունների անցկացման համար։ Այս մասին Զելենսկին հայտարարել է ուկրաինական 1+1 հեռուստաընկերությանը տված հարցազրույցում։
«Ես ասել եմ [դաշնակիցներին]՝ դուք պատրա՞ստ եք մեզ 5 միլիարդ տրամադրել։Կարծում եմ, որ խաղաղ պայմաններում ընտրություններ անցկացնելու համար հենց այդքան գումար է հարկավոր։ Թե ինչքան կպահանջվի պատերազմի ժամանակ, ես չեմ կարող ասել։ Այնպես որ, ես ասել եմ, որ Միացյալ Նահանգները և Եվրոպան պետք է օգնություն տրամադրեն։ Ամեն դեպքում, ես չեմ պատրաստվում վարկ վերցնել ընտրություններ անցկացնելու համար, չեմ պատրաստվում նաև այդ նպատակով ծախսել սպառազինության համար նախատեսված գումարները», - ասել է Զելենսկին։
Առաջիկա ընտրությունների թեման հրատապ դարձավ անցած շաբաթավերջին, երբ ամերիկացի կոնգրեսական Լինդսի Գրեմը Կիև կատարած այցի ընթացքում կոչ արեց նախագահ Զելենսկուն չհետաձգել նախագահական ընտրությունները և դրանք կազմակերպել անգամ շարունակվող ռազմական գործողությունների պայմաններում։
Օգոստոսի լույս 27-ի գիշերը Ուկրաինայի ռազմաօդային ուժերը կենտրոնական և հյուսիսային շրջաններում ոչնչացրել են չորս X-101/X-55/X-555 թևավոր հրթիռներ, հայտնում է Ուկրաինայի ռազմաօդային ուժերի հրամանատարությունը։
Գիշերը խփված հրթիռների բեկորների անկման պատճառով Կիևի մարզում տուժել է երկու մարդ, տուժել է տասը առանձնատուն։ Այս մասին հայտարարել է Կիևի մարզային ռազմական վարչակազմի ղեկավար Ռուսլան Կրավչենկոն։
Նշվում է, որ հրթիռները արձակվել են հինգ ռազմավարական ինքնաթիռներից, որոնք այդ պահին գտնվել են Ռուսաստանի օդային տարածքում՝ Էնգելս քաղաքի մոտ (Սարատովի մարզ)։
Ռուսաստանի պաշտպանության նախարարության հաղորդմամբ՝ գիշերը դաշնության Բրյանսկի և Կուրսկի շրջանները ենթարկվել են անօդաչու թռչող սարքերի հարվածներին։
Կուրսկում անօդաչու թռչող սարքը բախվել է բազմաբնակարան շենքին, տուժածներ չկան, հայտնում են տեղական իշխանությունները։
Օգոստոսի 27-ի գիշերը անօդաչուն մխրճվել է Կարլ Մարքսի փողոցում գտնվող բազմաբնակարան շենքի մեջ, հայտնել է շրջանի նահանգապետ Ռոման Ստարովոյտը։
Ռուսական կողմը պնդում է, որ ուկրաինացի զինվորականները փորձել են անօդաչու թռչող սարքի միջոցով գրոհել Մոսկվայի և Մերձմոսկովյան շրջանի օբյեկտները։
Պաշտպանության նախարարության հաղորդագրության համաձայն՝ օգոստոսի 26-ին՝ ժամը 03:00-ի սահմաններում, «հակաօդային պաշտպանությաունը ոչնչացրել է Մոսկվայի մարզի Իստրա շրջանի տարածքի վրա ուղղված անօդաչու թռչող սարքը»։
Գերատեսչությունը չի նշում՝ արդյոք անօդաչու թռչող սարքի հարվածի հետևանքով զոհեր կան։ Մոսկվայի քաղաքապետ Սերգեյ Սոբյանինը, սակայն, հայտնել է, որ, ըստ նախնական տվյալների՝ զոհեր և ավերածություններ չկան։
Մոսկվայի «Դոմոդեդովո», «Շերեմետևո» և «Վնուկովո» օդանավակայանները գիշերը կրկին փակ են եղել ինքնաթիռների ընդունման և մեկնելու համար մոտ մեկ ժամով, սակայն այս պահին դրանք աշխատում են բնականոն հունով, հայտնում է ՏԱՍՍ-ը՝ վկայակոչելով ավիացիոն ծառայությունները։ 24 չվերթ հետաձգվել է, ութը՝ չեղարկվել։
Ռուսաստանի տարածքը և Ղրիմը կրկին անօդաչուների և հրթիռների թիրախում էին։ Ռուսաստանի պաշտպանության նախարարության հաղորդմամբ՝ այս գիշեր Մոսկվային սահմանակից Կալուգայի մարզում վերափոխված Էս -200 հրթիռ է խոցվել և միաժամանակ 42 անօդաչու թռչող սարքեր Ղրիմում։ Սա թերևս ամենազանգվածային հարձակումն էր բռնակցված Ղրիմի վրա։ Ռուսական կողմը պնդում է, թե բոլոր դրոնները խոցվել են։
Մոսկվայի և Մոսկվայի մարզում անօդաչուների հարձակման մասին այս գիշեր չի հայտարարվել, սակայն մոսկովյան «Դոմոդևո» և «Վնուկովո» օդանավակայաններն այս գիշեր կրկին թռիչքներ չէին ընդունում։
Ուկրաինային սահմանակից Բելգորոդի մարզում էլ անցած օրվա ընթացքում արձակվել է ավելի քան 70 արկ, հայտարարել է մարզի նահանգապետ Վյաչեսլավ Գլադկովը։ Նրա խոսքով՝ բնակիչներից ոչ ոք չի տուժել, վնասվել է վեց տուն և երկու ավտոմեքենա։
Ռուսական բանակն էլ գիշերը երկու թևավոր հրթիռ է արձակել Օդեսայի մարզի ուղղությամբ։ Երկուսն էլ ուկրաինական ՀՕՊ-ը խոցել է։
Ուկրաինայի նախագահ Վլադիմիր Զելենսկին հայտարարել է, որ Կիևում Թուրքիայի արտգործնախարարի հետ քննարկել է հացահատիկի սևծովյան միջանցքի հարցը։ Հանդիպումից հետո Զելենսկին Telegram-ի իր ալիքում տեղեկացրել է, որ Ֆիդանի հետ «շատ կարևոր հարցեր» է քննարկել, մասնավորապես հացահատիկի մատակարման հարցը։
Կողմերը քննարկել են նաև Կիևի կողմից առաջ տարվող խաղաղության բանաձևը։
Սա Թուրքիայի արտգործնախարարի պաշտոնում Ֆիդանի առաջին այցն է Ուկրաինա։ Ավելի վաղ թուրքական ԶԼՄ-ները հայտնել էին, որ հացահատիկի գործարքի վերսկսումը կլինի Ուկրաինայի իշխանությունների հետ Ֆիդանի բանակցությունների հիմնական թեման։ Նույն թեման Թուրքիայի արտգործնախարարը նախատեսում է քննարկել Ռուսաստան կատարելիք այցի ժամանակ։
Ռուսաստանի փոխարտգործնախարար Սերգեյ Ռյաբկովը նշել է, որ ներկայումս մշակվում է Թուրքիայի արտգործնախարարի այցը Ռուսաստան, սակայն, հացահատիկի գործարքի վերաբերյալ Մոսկվայի դիրքորոշումը չի փոխվում։
Ռուսաստանի պաշտպանության նախարարությունը պնդում է, որ այս գիշեր ուկրաինական բանակը փորձել է հարվածել Ղրիմին՝ ավելի քան չորս տասնյակ անօդաչու թռչող սարքերով, բոլորը խոցվել են։
Ռուսաստանի ռազմական գերատեսչությունը նաև հայտարարել է, որ Կալուգայի շրջանում ուկրաինական հրթիռ է խոցվել։
Ռուսական բազմաթիվ Տելեգրամ ալիքներ գիշերը հաղորդում էին Կալուգայի, Տուլայի և Մոսկվայի շրջանների երկնքում լսվող ձայների մասին, ենթադրելով, որ հակաօդային պաշտպանությունն է աշխատում անօդաչու թռչող սարքերի ուղղությամբ: Մոսկվայի «Վնուկովո» և «Դոմոդեդովո» օդանավակայանները կրկին ժամանակավորապես փակվել էին:
Մոսկվայի «Վնուկովո», «Շերեմետևո», «Դոմոդեդովո» և «Ժուկովսկի» օդանավակայանները գործում են նորմալ ռեժիմով՝ ուրբաթ գիշեր ուժի մեջ մտած սահմանափակումներից հետո, հայտնում է Օդային տրանսպորտի դաշնային գործակալությունը։
Գործակալությունը, ինչպես նախորդ օրերին, չի պարզաբանել, թե ինչի հետ են կապված եղել գիշերային սահմանափակումները՝ դրանք անվանելով թռիչքների անվտանգության ապահովում։ Նշված ժամանակահատվածում թռիչքների մի մասը ուղարկվել են այլ օդանավակայաններ, նշել է գործակալությունը։
Ռուսաստանի նախագահ Վլադիր Պուտինը առաջին անգամ, արձագանքելով Պրիգոժինի օդանավի կործանմանը, ցավակցություն է հայտնել ու Պրիգոժինի մասին խոսել է անցյալ ժամանակով։
Տվերի շրջանում օդանավը կործանվել է չորեքշաբթի երեկոյան, 10 մարդ է զոհվել, մեկ օր անց՝ հիգշաբթի երեկոյան, Պուտինն ասել է․ - «Ինչ վերաբերում է այդ ավիաղետին, ապա առաջին հերթին ցանկանում եմ անկեղծ ցավակցության խոսքեր արտահայտել բոլոր զոհվածների ընտանիքներին։ Նախնական տվյալները վկայում են, որ այնտեղ գտնվել են «Վագներ» ընկերության աշխատակիցները, կցանկանայի նշել, որ այդ մարդիկ էական ներդում են ունեցել Ուկրաինայում նեոնացիստական ռեժիմի դեմ մեր ընդհանուր պայքարում։ Մենք դա հիշում ենք, գիտենք և չենք մոռանա»։
Բռնակցված Ղրիմում` Մայակ գյուղի մոտ, այսօր մարտ է տեղի ունեցել ջրային նավերի և ավիացիայի մասնակցությամբ, լսվել են պայթյուններ:
Ուկրաինայի պաշտպանության նախարարության հետախուզության գլխավոր վարչության ներկայացուցիչ Անդրեյ Յուսովը հաստատել է մարտի մասին տեղեկությունը։
«Պաշտպանության նախարարության գլխավոր հետախուզական վարչության ստորաբաժանումները հատուկ գործողության առաջադրանքներ են կատարել», - ասել է նա, մանրամասներ չի հայտնել, միայն հավելել է, թե ուկրաինական կողմն այդ մարտի ընթացքում զոհեր չի ունեցել։
Հրապարակված տեսանյութում, որն, ուկրաինական հետախույզների պնդմամբ, նկարահանվել է Ղրիմում, ուկրաինացի զինվորականներն ասում են. «Ուկրաինական Ղրիմում կրկին ծածանվում է պետական դրոշը, ուկրաինացիները Ղրիմի Ելենովկա և Մայակ բնակավայրերի տարածքում մարտի մեջ են մտել ռուսական ուժերի հետ»։
Ռուսաստանը տեղեկությունը պաշտոնապես չի մեկնաբանել։
Մայակ գյուղում տեղակայված է ռուսական 3-րդ ռադիոտեխնիկական գնդի հենակետը։ Ինչ էին անում այնտեղ Ուկրաինայի հատուկ ուժերի ներկայացուցիչները հայտնի չէ, երեկ ուկրաինական հետախուզությունը հայտնել էր, թե Ղրիմում ոչնչացվել է ռուսական C-400 համալիրը։