Արձագանքելով նախկին հանրապետական նախագահ Դոնալդ Թրամփի այն մեկնաբանությանը, թե «Փենսը կարող էր տապալել Բայդենի ընտրությունը», նախկին փոխնախագահ Մայք Փենսը երեկ խստորեն քննադատել է իր երբեմնի վերադասին և ասել, թե Թրամփը սխալվում է, եթե մտածում է, որ փոխնախագահը կարող էր ընդունել ընտրությունները գողանալու մասին նրա կեղծ պնդումները և փորձեր դիմել ընտրությունների արդյունքը վերանայելու գործողության:
«Նախագահ Թրամփը սխալվում է, ես չունեի ընտրությունների արդյունքը փոխելու իրավունք»,- ասել է Փենսը:
Այդ հայտարարությամբ նախկին հանրապետական փոխնախագահը հանդես է եկել «Ֆեդերալիստների ընկերություն» պահպանողական կազմակերպության հավաքի ընթացքում:
«Նախագահությունը պատկանում է Ամերիկայի ժողովրդին և միայն Ամերիկայի ժողովրդին, և՝ անկեղծ ասած, չկա էությամբ առավել հակաամերիկյան բան, քան ենթադրել, թե մի անձ կարող է ընտրել Ամերիկայի նախագահին»,- ասել է Փենսը:
2021 թվականի հունվարի 6-ին Թրամփի աջակիցների ամբոխը հարձակվել է Կապիտոլիումի վրա, փորձելով խափանել Կոնգրեսի կողմից ընտրությունների արդյունքների պաշտոնական վավերացումը:
Փենսը նախագահել է այդ նիստը և մնացած օրենսդիրների հետ միասին անվտանգության ուժերի ուղեկցությամբ լքել է շենքը:
Թրամփը հարձակումից րոպեներ առաջ հորդորել է Փենսին արգելափակել ընտրությունների արդյունքների վավերացումը:
Հարձակման ընթացքում տեղի են ունեցել բախումներ գրոհայինների և իրավապահների միջև, մի քանի մարդ, այդ թվում մեկ ոստիկան, զոհվել են, տասնյակ մարդիկ վնասվածքներ են ստացել, ավերվել է Կոնգրեսի երկու պալատների գույքը: Մի խումբ ջարդարարներ վանկարկել են «Կախե՛լ Փենսին» կարգախոսը:
Գրոհի կազմակերպիչներից և մասնակիցներից շատերը հետագայում կալանավորվել և ազատազրկվել են, դատական գործերի քննությունը շարունակվում է:
Թրամփն իր վերջին ելույթներից մեկում ասել է, որ եթե մասնակցի 2024-ի նախագահական ընտրություններին և հաղթի, ապա ներում կշնորհի հունվարյան գործերով ազատազրկվածներին:
