Աֆղանստանի նախագահ Աշրաֆ Ղանին արդարացրել է հայրենիքից հեռանալու որոշումը:
Նա գտնվում է Արաբական Միացյալ Էմիրություններում, որտեղ ասել է, թե լքել է Աֆղանստանը երկրում արյունահեղությունը կանխելու համար:
Ղանին ենթարկվել է խիստ քննադատության երկրից փախուստի դիմելու համար այն բանից հետո, երբ ակնհայտ է դարձել, որ թալիբները գրավում են մայրաքաղաք Քաբուլը:
Ղանին կտրականապես հերքել է Աֆղանստանից իր հետ մեծ գումար դուրս հանելու մասին ասեկոսեները:
«Իմ բոլոր արևմտյան գործընկերներն ինձ ասել են, որ եթե ես չհեռանամ, իրավիճակն էլ ավելի կվատթարանա, և իմ մնալը կարող է պատերազմ հրահրել, սակայն ես վճռեցի պատասխանատվություն դրսևորել իմ ժողովրդի հանդեպ: Ես չէի ուզում, որ մեզ մոտ սկսվի այն, ինչ տեղի է ունեցել Սիրիայում կամ Եմենում: Եթե ես մնայի, կենթարկվեի մահապատժի»,- ասել է Ղանին:
Տվյալ պահին հազարավոր մարդիկ, այդ թվում` օտարերկրացի դիվանագետներ, արտասահմանյան կազմակերպությունների աշխատողներ և շարքային աֆղանստանցիներ փորձում են հեռանալ Աֆղանստանից:
Թալիբները փակում են օդակայան տանող ճանապարհները: Աֆղանստանում մնացել են մոտ 4 և կես հազար ամերիկացի զինծառայողներ: Նրանց հիմնական առաջադրանքը Քաբուլի Համիդ Քարզայի անվան միջազգային օդակայանի պաշտպանությունն է և մարդկանց տարհանման անվտանգության ապահովումը:
