Առանձնապես խոշոր չափերով յուրացումներ կատարելու կասկածանքով այսօր ձերբակալվել են Գորիսի փոխքաղաքապետեր Իրինա Յոլյանը և Մենուա Հովսեփյանը։ Ընդ որում, Մենուա Հովսեփյանը կասկածվում է նաև ընտրական խախտումների մեջ, «Ազատությանը» փոխանցեց Քննչական կոմիտեի մամուլի քարտուղար Վարդան Թադևոսյանը։
«Յոլյանին ու Հովսեփյանին մեղադրանք է առաջադրվել 179-րդ հոդվածի 3-րդ մասի 1-ին կետով՝ առանձնապես խոշոր չափերով յուրացում կամ վատնում, իսկ Հովսեփյանին նաև օրենսգրքի 149.1-րդ հոդվածի 2-րդ մասի 1-ին և 2-րդ կետով՝ ծառայողական կամ այլ կախվածությունն օգտագործելով, պաշտոնեական դիրքն օգտագործելով նախընտրական քարոզչությանը մասնակցելու կամ նախընտրական քարոզչությանը մասնակցելուց հրաժարվելուն հարկադրելը խոչընդոտելը», - մանրամասնեց նա։
Այսօր համացանցում տարածված կադրերում երևում է, թե ինչպես են իրավապահները Գորիսի քաղաքապետարանի շենքից ուղեկցում երկու փոխքաղաքապետերին։ Նրանցից բացի, Քննչական կոմիտեի փոխանցմամբ՝ ձերբակալվել են նաև Գորիսի համայնքապետարանի 2 աշխատակիցներ՝ Արմինե Չոփչյանը և Սուսաննա Սարգսյանը: Գորիսի քաղաքապետարանից առգրավվել են փաստաթղթեր, խուզարկություն է իրականացվել նաև ձերբակալվածների բնակարաններում։
Գորիսի քաղաքապետարանում, աշխատակիցների շրջանում անհանգստություն կա, բայց շարունակում են աշխատել, «Ազատությանը» փոխանցեցին քաղաքապետարանից՝ այլ հարցերի չցանկանալով պատասխանել։
Թե կոնկրետ ինչ յուրացումների մասին է խոսքը՝ իրավապահները դեռ չեն մանրամասնում։ «Ազատությունը» փորձեց մանրամասներ ճշտել Մենուա Հովսեփյանի շահերի պաշտպան Արմեն Մելքոնյանից, ով փոխանցեց, որ մինչ ձերբակալությունը Գորիսի փոխքաղաքապետերից և աշխատակիցներից ոչ մեկը որևէ ծանուցում չի ստացել Քննչական կոմիտե ներկայանալու։ Առավոտյան անակնկալ կերպով Երևանից Գորիս հասած իրավապահները ձերբակալել և տարել են փոխքաղաքապետերին և երկու կին աշխատակիցներին։ Բոլորին մեղադրանք է առաջադրվել, ներկայացվել է կալանքի միջնորդություն։
«Անհիմն է մեղադրանքը, այդտեղ մեղադրանք չկա, առաջադրված մեղադրանքներում մեղավոր չեն ճանաչում», - ասաց նա:
Մեզ հետ զրուցելիս փաստաբանը Մելքոնյանը դեռևս գործի ողջ նյութերին ու մանրամասներին ամբողջությամբ ծանոթանալ չէր հասցրել, բայց նշեց, որ մեղադրանքն առաջադրվել է պատերազմի օրերին ուղարկված օգնությունն աղքատության ոչ համապատասխան սանդղակ ունեցող ընտանիքներին բաժանելու համար, խոսքը 115 ընտանիքի մասին է, ինչը որակվել է որպես միջոցների վատնում. «Չարաշահում չկա, վատնում, իբր էդ մարդկանց չէր հասնում օգնություն տալ, և իրենք օգնություն են տվել: 3 միլիոն 530 հազար դրամի մասին է խոսքը, ընդհանուր գումարն այդ է եղել: Դրա տեղն ասենք չորս անչափահաս երեխա, մի քանի անչափահաս երեխաներ ունեցող 3 կին և մեկ տղամարդ են կալանավորում, երբ որ մենք պատրաստ ենք հենց հիմա, ես իմ միջոցների հաշվին պատրաստ եմ այդ 3 միլիոն 530 հազարը վերականգնել, մինչև քննություն կլինի, կպարզվի»:
Փոխքաղաքապետ Մենուա Հովսեփյանին նաև մեղադրանք է առաջադրվել ընտրական խախտումների համար, մասնավորապե, ընտրական հավաքի ժամանակ 80 անձ ապահովելու համար։ Այս մասով մեղադրանքը կառուցվել է` հիմնվելով ավելի վաղ Գորիսի քաղաքապետ Առուշ Առուշանյանի դեմ Քարահունջի վարչական ղեկավար Լուսինե Ավետյանի տված ցուցմունքի վրա, ով ևս մեղադրվում է ընտրական մի շարք հանցագործություններ կատարելու մեջ։
«Դա ուղղակի Գորիսի քաղաքապետարանի գլխատում օպերացիա են իրականացնում, մի նպատակով` ըստ իս, որպեսզի քաղաքապետ չկա, կալանավորված է, տեղակալներին են կալանավորում են, որպեսզի կառավարությունը Գորիսի քաղաքապետ նշանակի: Սա այդ օպերացիան է գնում, ուրիշ բան չկա», - շեշտեց Հովսեփյանի պաշտպան Արմեն Մելքոնյանը:
Այս պահին փաստացի Գորիսը մնացել է առանց ղեկավարի։ Շուրջ մեկ ամիս առաջ կալանավորվել է նաև Գորիսի 30-ամյա քաղաքապետ Առուշ Առուշանյանը, ով մեղադրվում է ընտրական հանցագործությունների համար։ «Արմավիր» քրեակատարողական հիմնարկում պահվող, ընդդիմադիր «Հայաստան» դաշինքի նախընտրական ցուցակում 32-րդ տեղը զբաղեցնող Առուշանյանը մեղադրանքը չի ընդունում։
Գորիսի քաղաքապետից բացի, այժմ քրեական հետապնդման են ենթարկվում Սյունիքի խոշոր համայնքների մեծ մասի ղեկավարները։ Նրանց թվում է նաև Մեղրիի նախկին քաղաքապետ Մխիթար Զաքարյանը, ով չարաշահումներ կատարելու մեղադրանքով կալանավորվել էր մինչև Ռոբերտ Քոչարյանի գլխավորած դաշինքով պատգամավորական մանդատ ստանալը։
Քննչական կոմիտեն այսօր հաղորդեց, որ Զաքարյանի գործով նախաքննությունն ավարտվել է, և գործն առաջիկայում կուղարկվի դատարան:
Ըստ իրավապահների՝ 2016 թվականից Մեղրին ղեկավարած Զաքարյանը համայնքին պատկանող և վաճառքի ոչ ենթակա, արգելոց հանդիսացող «Շամբ» լճի ափը կեղծ փաստաթղթերով հանել է արգելոցների ցանկից և ծառեր տնկելու նպատակով օտարել է իր մտերիմներին, սակայն փոխարենն այնտեղ սրճարան է կառուցվել։ Այս գործով մեղադրանք է առաջադրվել 3 անձի, Մխիթար Զաքարյանը և նրա տեղակալ Արմեն Սամվելյանը կալանավորվել են, իսկ համայնքապետարանի գլխավոր մասնագետ Արտավազդ Արզումանյանը ստորագրությամբ ազատ է արձակվել։
Ընդդդիմադիր «Հայաստան» դաշինքի պատգամավոր ընտրված Զաքարյանը, ինչպես նաև վարչապետ Փաշինյանի հրաժարականը պահանջած սյունեցի մյուս համայնքապետերը իրենց դեմ քրեական գործերը քաղաքական հետապնդում են համարում։