ԱՄՆ Ներկայացուցիչների տունը երեկ ձայների մեծամասնությամբ ընդունեց կոնգրեսական Ֆրենկ Փալոնի առաջարկած օրենսդրական փոփոխությունը, որը սահմանափակում է Ամերիկայի կողմից ռազմական օգնության տրամադրումը Ադրբեջանին:
Փաստաթուղթը, որին միացել էին թե՛ դեմոկրատական, թե՛ հանրապետական օրենսդիրներ,արձանագրում է, որ հաջորդ տարի Ադրբեջանին չի կարող գումար հատկացվել Միջազգային ռազմական կրթության ու վերապատրաստման, ինչպես նաև` Արտաքին ռազմական ֆինանսավորման ծրագրերով: Այս երկու հոդվածներով` միասին վերցրած, անցած տարի Ադրբեջանը Վաշինգտոնից 1 միլիոն 600 հազար դոլար էր ստացել:
«Սա ազդակ է Ադրբեջանին», - քվեարկությունից հետո հայտարարեց առաջարկի հեղինակ, Կոնգրեսի Հայկական հարցերով հանձնախմբի համանախագահ Ֆրենկ Փալոնը: - «Այս նախագիծը հստակ ուղերձ է հղում, որ մենք չենք աջակցելու կամ հանդուրժելու բռնապետական վարչակազմերը, որոնք սպառնում են խաղաղությանն ու անվտանգությանը, հատկապես երբ այդ քայլերն ուղղված են ժողովրդավար երկրի դեմ»:
Քվեարկությունից առաջ` օրվա առաջին կեսին էլ դեմոկրատ կոնգրեսականն անդրադարձել էր հայ֊ադրբեջանական սահմանի լարվածությանը։ «Ադրբեջանի հարձակումները մասն են մի ծրագրի, որի նպատակն է յուրացնել Հայաստանի տարածքը և հարվածել ժողովրդավարությանը», - Թվիթերում գրել էր նա, հավելելով` եթե Բաքուն արժանի արձագանք չստանա, անընդհատ շարունակելու է մահաբեր այդ հարձակումները:
Երեկ ընդունված օրինագիծը, սակայն, միայն մասնակի է կրճատում Ամերիկայից ռազմական օգնություն ստանալու Ադրբեջանի հնարավորությունները: Բանն այն է, որ ուժի մեջ է մնում օրենքի մեկ այլ դրույթ, որը լիազորում է Ամերիկայի պաշտպանական գերատեսչությանը սեփական հայեցողությամբ ռազմական սարքավորումներ տրամադրել այս կամ այն երկրին` պայքարելու ահաբեկչության, թրաֆիքինգի կամ թմրամիջոցների ապօրինի շրջանառության դեմ: Սա հենց այն հոդվածն է, որով և անցած տարիներին Պենտագոնը տասնյակ միլիոնավոր դոլարներ է տրամադրել Ադրբեջանին: 2018-ին, մասնավորապես, այդ նպատակով Բաքուն ստացել էր ավելի քան 58 միլիոն դոլար, 2019-ին` ավելի քան 40 միլիոն: Անցած տարի` Ղարաբաղյան պատերազմի ֆոնին, երբ հայամետ կոնգեսականները հարց էին տվել` ինչու է երկու տարում վարչակազմը շուրջ 100 միլիոն դոլար հատկացրել Ադրբեջանին, Պաշտպանության դեպարտամենտի խոսնակ Մայք Հովարդը պարզաբանել էր․ - «Այդ աջակցության նպատակն է լուծել խնդիրներ, որոնք ազգային անվտանգության առումով կարևոր են թե՛ Ամերիկայի, թե՛ Ադրբեջանի համար»:
Փաստելով, որ Ադրբեջանին ռազմական օգնություն տրամադրելու այս լծակը դեռ մնում է ամերիկյան վարչակազմի ձեռքում, Հայ դատի հանձնախումբը հայտարարել է` շարունակելու է ջանքեր գործադրել նաև այս հնարավորությունը սառեցնելու համար: «Նպատակադրված և հաստատակամ` մենք կշարունակենք մեր օրենսդրական արշավը, որպեսզի Ալիևի բռնապետական վարչակազմն ամերիկացի հարկատուների գումարներից նույնիսկ մեկ դոլար չստանա», - հայտարարել է Վաշինգտոնի հայ դատի հանձնախմբի գործադիր տնօրեն Արամ Համբարյանը:
