«Բաքվում, Սումգայիթում, Գյանջայում և Ադրբեջանի այլ քաղաքներում մինչ օրս հազարավոր հայեր են ապրում», - պնդում է Ադրբեջանի արտգործնախարարությունը:
Արձագանքելով Հայաստանի արտաքին քաղաքական գերատեսչության երեկվա հայտարարությանը, պաշտոնական Բաքուն վստահեցրել է՝ «եթե չլինեին Ադրբեջանի դեմ Հայաստանի տարածքային հավակնությունները և ագրեսիայի քաղաքականությունը, այդ թիվը շատ բարձր կլիներ»:
«Այդ երկիրը, դեռևս ելնելով «պատմական» պատրանքներից, տարածքային հավակնություններ է ներկայացնում հարևան երկրներին: Տարածաշրջանի ամենափոքր և ամենաթույլ երկրի համար դա հեռու է իմաստուն քաղաքականություն լինելուց», - հայտարարել է Ադրբեջանի ԱԳՆ խոսնակ Լեյլա Աբդուլաևան:
Բաքվի «ռազմավարի պուրակի» առնչությամբ նա պնդել է, թե այն «ագրեսորի նկատմամբ իրավունքի և արդարության հաղթանակի խորհրդանիշ է»:
ՀՀ արտգործնախարարությունը երեկ հայտարարել էր, որ «ադրբեջանական կողմը, Հայաստանի հանդեպ առաջադրելով տարածքային և պատմական կեղծ պահանջներ, փորձում է մի կողմից միջազգային օրակարգից դուրս բերել ղարաբաղյան հակամարտությունը, իսկ մյուս կողմից՝ ստեղծել նոր սպառնալիքներ տարածաշրջանային անվտանգության և կայունության համար»:
Ադրբեջանի ԱԳՆ պաշտոնական ներկայացուցչի պնդմանը, թե պաշտոնական Բաքուն տարածքային պահանջներ չունի հարևանների նկատմամբ, իսկ Զանգեզուր, Սևան, Երևան ադրբեջանցիների «վերադառնալու» մասին խոսելով՝ նկատի ունեն 2020 թվականի նոյեմբերի 9-ի հայտարարության կետը փախստականների ու բռնի տեղանահվածների վերադարձի մասին, Հայաստանի արտաքին քաղաքական գերատեսչությունը հակադարձել էր. - «Եթե ելնենք վերոնշյալ փաստաթղթի՝ տեղահանվածների վերադարձի ադրբեջանական մեկնաբանության տրամաբանությունից, ապա հայ փախստականները պետք է վերադառնան Նախիջևան, Գանձակ, Բաքու, Սումգայիթ և ներկայիս Ադրբեջանի այլ հայաթափված տարածքներ»։
«Հայաստանին ռևանշիզմի մեջ մեղադրելուց առաջ Ադրբեջանը պետք է միջազգային հանրությանը բացատրի, թե որն է Բաքվի «ռազմավարի պուրակի» խորհուրդը, որը ոչ այլ ինչ է քան ռևանշիզմի և մարդատյացության ամոթալի «հուշարձան», - նաև շեշտել էր ՀՀ արտգործնախարարությունը։
