Միացյալ Նահանգները դատապարտում է Վրաստանում հուլիսի 5-ի հարձակումները քաղաքացիական հասարակության ակտիվիստների և լրագրողների դեմ, երեկ հայտարարել է Պետդեպարտամենտի խոսնակ Նեդ Փրայսը:
ԱՄՆ-ը Վրաստանի իշխանություններին հիշեցնում է նրանց պարտավորության մասին՝ պաշտպանելու «բոլորին, ովքեր իրենց սահմանադրական իրավունքներն են իրացնում, լրագրողներին, նաև բռնությունը հրապարակավ դատապարտելու պարտականությունը», հավելել է խոսնակը:
Փրայսը հայտնել է, որ Վրաստանում ԱՄՆ դեսպանատունը և մի շարք այլ օտարերկրյա դիվանագիտական ներկայացուցչություններ հայտարարություն են տարածել, որում դատապարտում են վրացի արմատականների բռնությունները Թբիլիսում:
Երկուշաբթի օրը վրացի ազգայնականները հարձակվել էին փոքրամասնությունների պաշտպանությանը միտված Tbilisi Pride շքերթի մասնակիցների և իրադարձությունը լուսաբանող լրագրողների վրա, մի քանի ժամ շարունակ արգելափակված պահել Թբիլիսիի կենտրոնական Ռուսթավելի պողոտան, Վրաստանի խորհրդարանի շենքից իջեցրել Եվրամիության դրոշը: Ի վերջո, շքերթի անցկացումը չեղարկվեց:
