Կրթութան, գիտության, մշակույթի և սպորտի (ԿԳՄՍ) նախարարի պատոնակատար Վահրամ Դումանյանն այսօր ընդունել է Կարմիր խաչի միջազգային կոմիտեի (ԿԽՄԿ) պատվիրակությանը՝ դրա ղեկավար Թիերի Ռիբոյի գլխավորությամբ, անդրադարձել նաև Ադրբեջանում պահվող հայ ռազմագերիների խնդրին։
Ըստ հաղորդագրության, նախարարի պատոնակատարը գերիներին հայրենիք վերադարձնելու գործում ակնկալել է Կարմիր խաչի միջազգային կոմիտեի աջակցությունը:
«Ադրբեջանում պահվող մեր հայրենակիցների խնդիրը որևէ կերպ չի տեղավորվում ժամանակակից աշխարհի և, առհասարակ, մարդու իրավունքների միջազգային նորմերի շրջանակում: Ի վերջո, կան կանոններ, որոնք 21-րդ դարում պետք է գործեն ողջ երկրագնդի վրա: Ցավոք, այսօր կյանքը հակառակն է ապացուցում, և այս հարցում մենք ապավինում ենք Կարմիր խաչի միջազգային կոմիտեի գործուն միջամտությանը, որն այս պայքարի առաջամարտիկն է»,- ասել է ԿԳՄՍ նախարարի պաշտոնակատարը:
Թիերի Ռիբոն իր հերթին նշել է, որ կոմիտեի աշխատակիցները պարբերաբար այցելում են ազատազրկման մեջ պահվող անձանց, ինչպես նաև աջակցում են նրանց ընտանիքներին՝ տեղեկատվության փոխանակման առումով: Նա վստահեցրել է, որ կոմիտեի աշխատակիցները մշտադիտարկում են ռազմագերիների ազատազրկման պայմանները:
Թիերի Ռիբոնի խոսքով՝ Կարմիր խաչի միջազգային կոմիտեն Տավուշի, Գեղարքունիքի և Սյունիքի մարզերում իրականացնում է մի շարք ծրագրեր՝ մեղմելու պատերազմական գործողությունների անմիջական ազդեցությունը սահմանամերձ համայնքների բնակիչների վրա:
Հայկական կողմի տարբեր տվյալներով` այսօր Ադրբեջանի տարածքում կա շուրջ 200 հայ ռազմագերի։ Մինչ այժմ Հայաստան է վերադարձվել 72-ը, նաև Բեյրութ է վերադարձել մի լիբանանահայ կին։
Ադրբեջանը հաստատել է 72 հոգու գերեվարման փաստը, ընդ որում՝ պնդելով, թե նրանցից 56-ը, որոնք Խծաբերդում գերեվարված պահեստազորայիններն են, ոչ թե ռազմագերիներ են, այլ «ահաբեկիչներ և դիվերսանտներ»:
Հայկական կողմն Ադրբեջանին է փոխանցել 15 անձի, նրանց թվում ոչ միայն ռազմագերիներն են, այլև Արցախում երեխայի սպանության ու այլ հանցագործությունների համար դատապարտված երկու ադրբեջանցիները։
Նշենք, որ մայիսի 12-ից իրավիճակը Սյունիքի և Գեղարքունիքի մարզերում հայ-ադրբեջանական սահմանի որոշ հատվածներում լարված է, հայկական կողմը հաղորդում է ադրբեջանական զինուժի՝ մի քանի ուղղություններով Հայաստանի տարածք ներխուժելու մասին։ Անցած շաբաթներին տեղի ունեցած բախումներում 6 հայ զինծառայող է գերեվարվել։
