«Այս բանակցությունների ընթացքում երեկվա բանակցությունները, երեկվա փուլը բավականին արդյունավետ է ավարտվել», - առավոտյան Գորիսում «Ազատության» հարցին ի պատասխան հայտարարեց Ազգային ժողովի «Իմ քայլը» խմբակցության պատգամավոր Արմեն Խաչատրյանը։
«Այսքանը կարող եմ ասել, բայց դետալային չեմ ուզում ներկայացնել, թե արդյունավետությունը ինչումն է կայանում։ Ամեն դեպքում, երեկվա բանակցությունները արդյունավետ են ավարտվել, կարծում եմ՝ Պաշտպանության նախարարությունը շուտով տեղեկատվություն կտրամադրի այդ մասին», - նշեց իշխող խմբակցության պատգամավորը։
«Կրկնում եմ՝ երեկվա բանակցությունների ավարտը արդյունավետ է եղել, սակայն պետք է ասեմ, որ բանակցությունները շարունակելի են, դեռևս խնդիր կա, և այդ խնդիրների լուծման ուղղությունը ևս բանակցությունների մեջ է», - ընդգծեց Խաչատրյանը՝ շարունակելով․ - «Բանակցությունները չեն ավարտվել, ուղղակի այսօր, իմ տեղեկություններով, բանակցություններ դեռևս չեն լինի։ Սակայն այն, որ բանակցությունները չեն ավարտվել և շարունակվելու են, դա միանշանակ է»։
Միաժամանակ, նա կոչ արեց «բոլորին, բոլոր պաշտոնյաներին՝ նախկին, ներկա, զինվորականներին, պաշտոններ զբաղեցնողներին և զբաղեցրածներին՝ իրենց հայտնի տեղեկությունները չհրապարակել, եթե անգամ վստահ են, որ դրանք ճիշտ են՝ այս պահի դրությամբ չի կարելի այս բանակցային պրոցեսի մեջ և այս լարված իրավիճակի մեջ տեղեկություններ տարածել, որոնք կարող են ամբողջապես, 180 աստիճան փոխել ամեն ինչի ելքը»։
Իշխող խմբակցության պատգամավորը հաստատեց, որ երեկվա բանակցություններին մասնակցել է Արցախում ռուսական խաղաղապահ զորքերի հրամանատար գեներալ Ռուստամ Մուրադովը։
Պաշտոնական Երևանը հաղորդում է, որ մայիսի 12-ից սկսած ադրբեջանական զինուժը առնվազն երեք ուղղություններով ներխուժել է Հայաստանի Հանրապետության տարածք և փաստացի ամրացել մի քանի կիլոմետր խորության վրա։ Ադրբեջանի հետ սահմանին ստեղծված իրավիճակի առնչությամբ Հայաստանը պաշտոնապես դիմել է ՀԱՊԿ-ին, ինչպես նաև ՌԴ նախագահին ռազմական օգնության համար:
Մինսկի խմբի համանախագահներ Միացյալ Նահանգները և Ֆրանսիան Ադրբեջանից պահանջել են դուրս բերել իր զինծառայողներին Հայաստանի ինքնիշխան տարածքից։
Պաշտոնական Բաքուն պնդում է, թե ադրբեջանական բանակն «ուղղակի զբաղեցնում է իր դիրքերը»:
Կողմերի միջև բանակցություններ են ընթանում։
