ՈւԵՖԱ-ի Չեմպիոնների լիգայի եզրափակիչ հանդիպման վայրը կարող է նորից փոխվել:
Եզրափակիչը նախատեսված էր մայիսի 29-ին Ստամբուլում, սակայն հաշվի առնելով Թուրքիայում կորոնավիրուսի համավարակի հետ կապված ճգնաժամը՝ ՈւԵՖԱ-ն որոշել է «Մանչեստեր Սիթի» - «Չելսի» խաղը տեղափոխել Լոնդոն՝ «Ուեմբլի» մարզադաշտ:
Սակայն այսօր էլ հաղորդվել է Անգլիայում խաղի կազմակերպման հետ կապված խնդիրների մասին:
Reuters լրատվական գործակալության փոխանցմամբ, եզրափակիչը լուսաբանող լրագրողների, պաշտոնական պատվիրակությունների և տեխնիկական աշխատակիցների ներկայությունն «Ուեմբլի» մարզադաշտում ապահովելու համար անհրաժեշտ են կարանտինի առումով բացառություններ, որոնք մինչև մայիսի 29-ը գրեթե անհնարին կլինի համաձայնեցնել:
Այս իրավիճակում ՈւԵՖԱ-ն քննարկում է եզրափակիչը Պորտուգալիայում՝ Պորտո քաղաքի մարզադաշտում անցկացնելու տարբերակը:
Դեռ անցյալ տարի Ստամբուլում պետք է տեղի ունենար ՈւԵՖԱ-ի Չեմպիոնների լիգայի 2019-20 թվականների մրցաշրջանի եզրափակիչը, սակայն կորոնավիրուսի համավարակի հանգամանքով խաղն անցկացվել է Լիսաբոնում:
Այս տարի Պորտուգալիայի իշխանությունները նկատել են տվել, որ եթե ՈւԵՖԱ-ն վերստին պորտուգալացիներին վստահի խաղի անցկացումն, ապա Լիսաբոնի փոխարեն գերադասելի է ընտրել Պորտոն:
