ԱՄՆ ընտրյալ նախագահ Ջո Բայդենը մտադիր է պետքարտուղարի պաշտոնում առաջադրել Էնթոնի Բլինքենի թեկնածությունը։ Այս մասին հայտնում են ամերիկյան լրատվամիջոցները՝ վկայակոչելով իրենց աղբյուրները։
58-ամյա Բլինքենը Բարաք Օբամայի նախագահության օրոք զբաղեցրել է պետքարտուղարության ղեկավարի տեղակալի պաշտոնը: CNN-ը նշում է, որ 2014 թվականին դիվանագետը առանցքային դերակատարություն է ունեցել Սպիտակ տան արտաքին քաղաքականության, այդ թվում` Ռուսաստանի կողմից Ղրիմի բռնակցմանը ամերիկյան արձագանքի հարցում:
Բլինքենը նաև մասնակցել է «Ալ-Ղաիդա» ահաբեկչական խմբավորման պարագլուխ Ուսամա բեն Լադենի, ինչպես նաեւ «Իսլամական պետություն» ահաբեկչական խմբավորման դեմ գործողություններին։
Բլինքենն այն ժամանակ փոխնախագահ Ջո Բայդենի ազգային անվտանգության հարցերով խորհրդականն էր:
Ամերիկյան լրատվամիջոցների տվյալներով՝ ՄԱԿ-ում ԱՄՆ-ի մշտական ներկայացուցչի պաշտոնում Բայդենը կարող է առաջադրել Լինդա Թոմաս-Գրինֆիլդի թեկնածությունը, ով Օբամայի նախագահության տարիներին պետքարտուղարի օգնականն էր:
Բայդենի ներկայացուցիչն առայժմ հրաժարվում է հաստատել այս լուրերը, հնարավոր է՝ թեկնածուների առաջադրման մասին ընտրյալ նախագահը հայտարարի նոյեմբերի 24-ին:
