Գերմանական լրատվամիջոցները պարզել են, որ կանցլեր Անգելա Մերկելը գաղտնի պայմաններում այցելել էր Բեռլինի «Շարիտե» հիվանդանոցում բուժումը շարունակող ռուսաստանցի ընդդիմադիր գործիչ Ալեքսեյ Նավալնիին։ Այս մասին հայտնում է գերմանական Der Spiegel-ը:
Նավալնին հաստատել է տեղեկությունը՝ նշելով, որ հանդիպումը ոչ թե գաղտնի էր, այլ մասնավոր: «Մասնավոր հանդիպում և զրույց ընտանիքի հետ», - մեկնաբանել է ռուսաստանցի ընդդիմադիր գործիչը։
Բեռլինյան հիվանդանոցում Նավալնին բուժում է ստացել 32 օր, որից երկու շաբաթը՝ կոմայում: Գերմանիայի կառավարությունը պնդում է, որ նա թունավորվել է «Նովիչոկ» տեսակի նյութով:
Սեպտեմբերի 22-ին Նավալնին դուրս է գրվել հիվանդանոցից, սակայն վերականգնողական բուժումը Գերմանիայում շարունակվում է:
Եվրամիությունը և Միացյալ Նահանգները կոչ են անում Ռուսաստանին հետաքննել Նավալնիի վրա հարձակումը: Ռուսաստանում, սակայն, պնդում են, որ քրեական գործ հարուցելու համար հիմքեր չկան, քանի որ հայրենիքում Նավալնիի բուժզննման արդյունքում թույնի հետքեր չեն հայտնաբերել:
