Ընդունելության քննություններում բարձր գնահատականներ ստացած ու այդպես էլ որևէ ԲՈւՀ չընդունված դիմորդներն ու նրանց ծնողները շարունակում են բողոքել: Այս տարի 739 դիմորդ անցողիկ շեմը հաղթահարել՝ ու ԲՈւՀ չի ընդունվել, նրանց մեջ նաև 17-18-19 միավոր հավաքածներ են:
Օրինակ, 12 տարվա գերազանցիկ Էվելինան 18,5 է ստացել ու ուսանող չի դարձել. – «Առաջին հայտով դիմել եմ Երևան պետական համալսարանի իրավագիտություն, երկրորդ հայտով` միջազգային, բայց ոչ մի տեղ չեմ անցել»:
Այս տարօրինակ իրավիճակը ընդունելության կարգի փոփոխության հետևանք է: Այս տարի առաջին անգամ ընդունելության մրցույթն անցկացվել է հայտնի միայն առաջին տողով նշված մասնագիտության գերակայությամբ: Մյուս տողերը հաշվի են առնվում՝ եթե թափուր տեղեր կան։
Այսօր խորհրդարանական երեք խմբակցությունների պատգամավորներ քննարկման էին հրավիրել կրթական գերատեսչության, Գնահատման և թեստավորման կենտրոնի ներկայացուցիչներին՝ քննարկելու բարձր միավորներով դուրս մնացած դիմորդների հարցը:
«Մի շարք առաջարկներ ենք ներկայացրել», - ասաց «Իմ քայլից» Սոֆյա Հովսեփյանը: - «Տեղերի ավելացումը մեր առաջնահերթ առաջարկն ու պահանջն է եղել, սակայն նախարարությունը և ԳԹԿ-ի ներկայացուցիչները պատասխանեցին, որ դա բացարձակ հնարավոր չի այս պարագայում»:
ԿԳՄՍ նախարարության բարձրագույն ու հետբուհական մասնագիտական կրթության վարչության պետ Ռոբերտ Սուքիասյանը քննարկման ավարտից հետո որոշակի ոչինչ չասաց. - «Առաջարկների արդյունքում կներկայացնենք նախարարություն, կքննարկեն: Դրա արդյունքում կորոշվի»:
«Ազատության» հարցին, թե երբ պարզ կդառնա տեղեր կավելացվեն, թե ոչ, Սուքիասյանն արձագանքեց. – «Այսօր, երբ որ կավարտվի հայտերի ամփոփումը, վաղը, մյուս օրը կտեղեկացնեն: Եթե էդպիսի հարց լինի»:
Նա դիմորդներին հորդորում է չհրաժարվել նախընտրելի մասնագիտությամբ հեռակա սովորելու հնարավորությունից: Հույս է տալիս, որ լավ առաջադիմության դեպքում կարող են առկա ուսուցման անցնել:
Սուքիասյանը նաև հազարավոր թափուր տեղերի մասին է հիշեցնում: Դրանց հայտերի լրացման վերջանաժամկետն այսօր 18.00-ն էր. – «Խնդիրը կայանում է նրանում, որ դիմորդը ինքը պետք է ցանկանա»:
Իսկ դիմորդները չեն ցանկանում: Նրանք պահանջում են տեղերի ավելացում իրենց նախընտրած մասնագիտություններով:
Իսկ թափուր տեղերը շատ են: «Դուրս մնացածները 739-նն են, թափուր տեղերը` 11 հազար», - ասում է Գնահատման և թեստավորման կենտրոնի փոխտնօրեն Կարո Նասիբյանը. – «Ագրարային համալսարան, պոլիտեխնիկ... Նույնիսկ Ագրարայինում տնտեսագիտական մասնագիտություններով շատ ու շատ ավելի, նույնիսկ էդ դիմորդների թվից շատ»:
Բայց, օրինակ, անգլերեն մասնագիտությամբ թափուր տեղ չկա:
Իշխող կուսակցության ներկայացուցիչ Սոֆյա Հովսեփյանը գործադիրի իրականացրած ընդունելության կարգի փոփոխությունը, որի հետևանքնով առաջացել է այս խառնաշփոթը, համարում է լավ տարբերակ, բայց` եթե շրջանավարտները իրազեկվեին և մինչև քննությունները մասնագիտական կողմնորոշման վերաբերյալ գիտելիք ստանային. – «Դպրոցներում որևէ կերպ մասնագիտական կողմնորոշման դասընթացներ, պատրաստումներ չի անցել: Եվ էսպես բերել ու միանգամից որոշել, որ պետք է, այ, մի լավ մոդել կա, դնել և այսպիսի իրավիճակ ստեղծել... նաև դնելուց առաջ պետք է հասկանային, որ այսօրվա օրը պետք է լինի»:
Մարտունու տարածաշրջանի Ծովինար գյուղից Բաղրամյան 19 հասած Հռիփսիմեն 16,75 բալով դուսր է մնացել երազած բուժֆակից, վստահ է պնդում ՝ չի նահանջելու. – «Մանկուց էդտեղ եմ ուզել սովորել: Մեր գյուղում բարձր եմ ստացել շատերից: Բոլորը իրենց ուզած տեղն ընդունվել են, բացի ինձանից»:
