Ազգային ժողովի նիստը, որի ժամանակ քննարկվելու է «Բարգավաճ Հայաստան» կուսակցության (ԲՀԿ) առաջնորդ և խորհրդարանական խմբակցության ղեկավար Գագիկ Ծառուկյանին պատգամավորական անձեռնմխելիությունից զրկելու՝ գլխավոր դատախազ Արթուր Դավթյանի միջնորդությունը, մեկնարկել է:
Գլխավոր դատախազն ԱԺ ամբիոնից ներկայացրեց միջնորդությունը: Թեև հարուցված է ԲՀԿ առաջնորդին առնչվող երեք քրեական գործ, Արթուր Դավթյանն իր միջնորդությունում անդրադարձավ միայն 2017 թվականի խորհրդարանական ընտրություններում կաշառք բաժանելու գործին:
Ծառուկյանը, ըստ ԲՀԿ-ական պատգամավորների, խորհրդարանում է, սակայն նիստերի դահլիճ նա առայժմ չի մտել:
ԲՀԿ խմբակցության պատգամավորներից Նաիրա Զոհրաբյանը վստահեցրեց, որ Գագիկ Ծառուկյանը այսօր ելույթ է ունենալու:
Խմբակցության քարտուղար Արման Աբովյանը, իր հերթին, ասաց, թե լինելու են անակնկալներ:
Գլխավոր դատախազը երեկ է միջնորդություն ներկայացրել ԲՀԿ առաջնորդին 2017-ի խորհրդարանական ընտրություններում կաշառք բաժանելը կազմակերպելու մեղադրանք առաջադրելու և նրան ազատությունից զրկելու վերաբերյալ:
«Բարգավաճ Հայաստան»-ի առաջնորդը պնդում է, որ այդ քրեական գործերը հորինված են քաղաքական պատվերով:
