Հայաստանում անցած մեկ օրում կորոնավիրուսի դեպքերի թիվն աճել է 374-ով՝ հասնելով 6 հազար 302-ի, գրանցվել է հիվանդությունից մահվան ևս 3 դեպք, հաղորդում է Առողջապահության նախարարության Հիվանդությունների վերահսկման և կանխարգելման ազգային կենտրոնը:
Կենտրոնի պաշտոնական կայքէջում հրապարակված տվյալների համաձայն՝ հիվանդությունից բուժվածների թիվն ավելացել է 62-ով և հասել 2 հազար 936-ի:
Մահվան դեպքերի վերաբերյալ Առողջապահության նախարարությունը հայտնում է, որ պացիենտները եղել են 74 տարեկան տղամարդ, 86 և 54 տարեկան կանայք, և ունեցել են ուղեկցող քրոնիկական հիվանդություններ:
Մահացածների ընդհանուր թիվը հասավ 77-ի, կորոնավիրուսով վարակված ևս 32 անձ, ըստ Առողջապահության նախարարության, մահացել է այլ պատճառներով:
Ըստ նույն աղբյուրի՝ իրականացված թեստավորումների ընդհանուր թիվը 49 հազար 80 է:
Այսպիսով, կորոնավիրուսային հիվանդությունից տվյալ պահին Հայաստանում բուժվում է 3 հազար 257 մարդ:
