Լեռնային Ղարաբաղում նախագահական ընտրությունների երկրորդ փուլից 9 օր առաջ, նախագահի թեկնածուներից Մասիս Մայիլյանը ֆեյսբուքյան իր էջում կոչ է արել արցախցիներին չմասնակցել ապրիլի 14-ին կայանալիք ընտրություններին՝ հաշվի առնելով կորոնավիրուսի տարածման վտանգը։
Արցախի արտաքին գործերի նախարարը նաև ընդգծում է՝ մարտի 31-ին կայացած համապետական ընտրությունները շատ հեռու էին նոր պայմաններում արցախյան հանրության ակնկալած ընտրական զարգացումներից, և ինքը պարզապես ի գիտություն է ընդունում քվեարկությունից հետո Արցախի կենտրոնական ընտրական հանձնաժողովի (ԿԸՀ) հրապարակած տվյալները։
Հիշեցնենք՝ Ղարաբաղում մարտի 31-ին կայացած ընտրություններում, նախագահի թեկնածուներից և ոչ մեկին չհաջողվեց 50 + 1 տոկոս ձայն ստանալ, ինչի արդյունքում ամենաշատ ձայներ ստացած նախկին վարչապետ Արայիկ Հարությունյանը և 2-րդ տեղում հայտնված արտաքին գործերի նախարար Մասիս Մայիլյանը պետք է պայքարեն երկրորդ փուլի համար։
Նկատենք՝ Արցախի ընտրական օրենսգրքի համաձայն, նախագահի թեկնածուն քվեարկության օրվանից ոչ ուշ, քան 10 օր առաջ դիմում ներկայացնելու դեպքում միայն իրավունք ունի հանել իր թեկնածությունը:
Արցախի ԿԸՀ նախագահ Սրբուհի Արզումանյանը «Ազատությանը» տեղեկացրին, որ սահմանված ժամկետներում Մասիս Մայիլյանից դիմում չեն ստացել: Հետևաբար ապրիլի 14-ին կայանալիք նախագահական ընտրություններում քվեաթերթիկում ընդգրկված կլինի նաև Մասիս Մայիլյանի անունը: Ապրիլի 7-ին կայանալիք նիստում ԿԸՀ-ն կամփոփի առաջին փուլի վերջնական արդյունքները, որից հետո արդեն կսահմանվի նաև քվեաթերթիկի նմուշը։
«Հաշվի առնելով ինքնաբացարկի դիմումների բացակայությունը՝ ներառված կլինեն առավելագույն ձայներ ստացած հանրապետության նախագահի երկու թեկնածուների տվյալները: այս պարագայում՝ Արայիկ Հարությունյանի և Մասիս Մայիլյանի անունները», - ասաց Արզումանյանը:
Նշենք, որ Մայիլյանը հեռախոսազանգերին չի պատասխանում և նրանից որևէ մեկնաբանություն ստանալու հնարավորություն չկա։
Փոխարենը, ամենաշատ ձայներ ստացած նախագահի թեկնածու Արայիկ Հարությունյանը, «Ազատության» հետ զրույցում նշեց, որ Մասիս Մայիլյանի որոշումը հարգում է, ինչ վերաբերում է կորոնավիրուսին, ապա դրա տարածման վտանգավորության մասին պետք է հայտարարի Արցախի օեպրատիվ շտաբը։
«Ընդամենը մի քանի օր է մնացել, և մենք պետք է ավարտենք սահմանադրական մեր պահանջը և ավարտենք ընտրությունները», - ասաց Հարությունյանը:
Հարցին՝ այսինքն իր կոչն է քաղաքացիներին գնալ և մասնակցել ընտրություններին, Արայիկ Հարությունյանը պատասխանեց. «Ես դեռ կոչ չեմ արել, իրավիճակից ելնելով ես կոչ կանեմ, ես դեռ պատրաստ չեմ: Թող Կենտրոնական ընտրական հանձնաժողովը հայտարարի արդյունքները վերջնական, որից հետո ես էլ իմ կոչը կանեմ մեր հայրենակիցներին, եթե չէ, ես որևէ կոչ դեռ չունեմ անելու»:
«Ազատության» հարցին էլ, թե այս պահին այդպիսի վտանգ, որը կստիպի նման հայտարարություն անել չի՞ տեսնում, Հարությունյանն արձագանքեց. «Ես տեղյակ չեմ, ես սովորական քաղաքացի եմ, ես առաջնորդվում եմ ինչ-որ գրված է օպերատիվ շտաբի և կառավարության հայտարարություններով, ցուցումներով և այլն»:
Ղարաբաղի կառավարությունը, առ այս պահը, ապրիլի 14-ին կայանալիք նախագահական ընտրությունների 2-րդ փուլը հետաձգելու որոշում չունի: Տեղի պաշտոնյանները պնդում են՝ վարակակիր Ղարաբաղում չկա։
Արցախում նոր կորոնավիրուսի տարածման կանխարգելման աշխատանքները համակարգող միջգերատեսչական հանձնաժողովի տեղեկատվական շտաբի համակարգող Տիգրան Աբրահամյանը «Ազատությանը» փոխանցեց, որ մեկ քաղաքացի, ով Արցախ է ժամանել Արտաշատից, մեկուսացված է, կան նաև ինքնամեկուսացվածներ։
Մեկուսացված քաղաքացին դեռևս թեստ չի հանձնել, քանի որ նրա մոտ առայժմ ախտանիշներ ի հայտ չեն եկել, նրա հետ շփված անձինք մեկուսացվել են։
Ի դեպ, Արցախում կորոնավիրուսի ախտորոշման լաբորատորիաներ չկան։ Փորձանմուշները ուղարկվում են Հայաստան։
Աբրահամյան. - Այս պահի թարմացումներով կորոնավիրուսի դեպք չունենք գրանցված: Այդ մեկ քաղաքացին է այս պահին մեկուսացված, որը գտնվում է բուժհաստատությունում: Ով ունենում է որևէ ախտանիշ, որը կարող է այս նոր վարակի հետ կապված լինել, մենք անհրաժեշտ թեստավորում անում ենք:
«Ազատություն». – Քանի՞ թեստավորում եք իրականացրել և ո՞ր ժամանակահատվածից սկսած:
Աբրահամյան. - Մոտ չորս տասնյակ թեստավորում է իրականացվել, եթե չեմ սխալվում, դրանք եղել են մարտի երկրորդ կեսից հետո:
«Ազատություն». – Թեստերի քանակը բավարա՞ր է Լեռնային Ղարաբաղում:
Աբրահամյան. - Մենք փորձանմուշները վերցնում ենք, բայց ուղարկում ենք Հայաստանի Հանրապետություն՝ մեր գործընկերներին:
«Ազատություն». – Այնտեղի լաբորատորիաներում որոշում են՝ դրական է, թե բացասական է, դուք չունե՞ք այդ ռեսուրսները, որ տեղում անեք:
Աբրահամյան. - Այս պահին Հայաստանում է իրականացվում, չեմ բացառում, որ ինչ-որ փուլում նաև մեր մոտ՝ Արցախում կիրականացվի:
«Ազատություն». – Իսկ թեստերը Հայաստանից ստացե՞լ եք արդեն, բավարար չափով ունե՞ք:
Աբրահամյան. - Այդ անհրաժեշտ աշխատանքը Հայաստանի հետ կարգավորվում է, որևէ խնդիր այս պահի դրությամբ չի առաջացել:
