Այս պահի թարմացումներով Արցախում կորոնավիրուսի գրանցված դեպք չկա, «Ազատության» հետ զրույցում ասաց Ղարաբաղում նոր կորոնավիրուսի տարածման կանխարգելման աշխատանքները համակարգող միջգերատեսչական հանձնաժողովի տեղեկատվական շտաբի համակարգող Տիգրան Աբրահամյանը:
Աբրահամյան. - Այս պահի թարմացումներով կորոնավիրուսի դեպք չունենք գրանցված: Ամսի 2-ին տվել էինք, որ ունենք մեկուսացված մեկ քաղաքացի, որը Քաշաթաղի բուժմիավորումում է, սակայն ախտանիշ չլինելու պատճառով իրեն մեկուսացրել ենք, բայց դեռևս թեստավորում չենք իրականացրել:
«Ազատություն». – Ինչո՞ւ անմիջապես չի թեստավորվում:
Աբրահամյան. - Թեստավորումը անհրաժեշտ ախտանիշների ժամանակ է իրականացվում, քանի որ առկա ընթացակարգերով ախտանիշ չլինելու դեպքում թեստավորումը այդ պահին կարող է ոչ ճիշտ արդյունք գրանցել:
«Ազատություն». – Իսկ ինչի՞ց եք եզրակացրել, որ նա հնարավոր է վարակակիր լինի և մեկուսացրել եք, նա վարակակրի հե՞տ է շփվել:
Աբրահամյան. - Իրան մեկուսացրել ենք, որովհետև նա Հայաստանից է մուտք գործել Արցախ, բայց գրանցումով, իհարկե, եղել է Արցախի քաղաքացի, սակայն եկել է բնակավայրից, որտեղ վարակման դեպքեր են եղել, և դրա համար մենք մեկուսացրել ենք:
«Ազատություն». – Ո՞ր բնակավայրն է:
Աբրահամյան. - Արտաշատի շրջանից է եկել:
«Ազատություն». – Այսինքն՝ դուք ունեք միայն մեկ մեկուսացված քաղաքացի, այո՞:
Աբրահամյան. - Այդ մեկ քաղաքացին է այս պահին մեկուսացված, որը գտնվում է բուժհաստատությունում:
«Ազատություն». – Իսկ ինքնամեկուսացվածներ չունե՞ք:
Աբրահամյան. - Ինքնամեկուսացված քաղաքացիներ ունենում ենք: Օրինակ՝ այս պարագայում, երբ որ նա եկել է, նրա հնարավոր կոնտակտային անձանց մեր հորդորով ինքնամեկուսացվում են, մինչև նրա վերջնական թեստավորումը:
«Ազատություն». – Այս պահին քանի՞ ինքնամեկուսացված կա:
Աբրահամյան. - Այս պահին դեռ պատրաստ չեմ թվերը հրապարակելու, ամփոփիչ տվյալները իմ ձեռքի տակ չեն, բայց ինքնամեկուսացված քաղաքացիներ կան, որոնք որևէ ախտանիշ չունեն: Ով ունենում է որևէ ախտանիշ, որը կարող է այս նոր վարակի հետ կապված լինել, մենք անհրաժեշտ թեստավորում անում ենք:
«Ազատություն». – Քանի՞ թեստավորում եք իրականացրել և ո՞ր ժամանակահատվածից սկսած:
Աբրահամյան. - Մոտ չորս տասնյակ թեստավորում է իրականացվել, եթե չեմ սխալվում, դրանք եղել են մարտի երկրորդ կեսից հետո:
«Ազատություն». – Թեստերի քանակը բավարա՞ր է Լեռնային Ղարաբաղում:
Աբրահամյան. - Մենք փորձանմուշները վերցնում ենք, բայց ուղարկում ենք Հայաստանի Հանրապետություն՝ մեր գործընկերներին:
«Ազատություն». – Այնտեղի լաբորատորիաներում որոշում են՝ դրական է, թե բացասական է, դուք չունե՞ք այդ ռեսուրսները, որ տեղում անեք:
Աբրահամյան. - Այս պահին Հայաստանում է իրականացվում, չեմ բացառում, որ ինչ-որ փուլում նաև մեր մոտ՝ Արցախում կիրականացվի:
«Ազատություն». – Իսկ թեստերը Հայաստանից ստացե՞լ եք արդեն, բավարար չափով ունե՞ք:
Աբրահամյան. - Այդ անհրաժեշտ աշխատանքը Հայաստանի հետ կարգավորվում է, որևէ խնդիր այս պահի դրությամբ չի առաջացել:
