Թուրքերը պատվիրակություն են ուղարկում Ռուսաստան
Թուրքիայի նախագահ Ռեջեփ Թայիփ Էրդողանը երեկ հայտարարել է, որ մարտական գործողություններից փախուստի դիմող տասնյակ հազարավոր սիրիացիներ Իդլիբի շրջանից շարժվում են դեպի Թուրքիա: Նա ասել է, որ այդ ալիքը կարող է հասնել նաև Եվրոպա:
«Իդլիբից ավելի քան 80 հազար մեր եղբայրներ փախչում են ռումբերից, սկսել են մոտենալ մեր սահմաններին: Եթե բռնությունն Իդլիբի ժողովրդի նկատմամբ չդադարեցվի, այս թիվը կավելանա: Այդ դեպքում Թուրքիան չի վերցնի ամբողջ բեռն իր ուսերին: Բացասական ազդեցությունը կստեղծի ճնշում, որը կզգան եվրոպական մի շար երկրներ, հատկապես Հունաստանը», - նշել է Թուրքիայի ղեկավարը:
Այս օրերին Սիրիայի նախագահ Բաշար ալ-Ասադի բանակը ռուսական օդուժի օգնությամբ հուժկու ռմբահարումների է ենթարկում Իդլիբի նահանգը: Առավել ծանր կացություն է Սարաքեբի ավանում: Կան տասնյակ զոհեր և բազմաթիվ վիրավորներ, այդ թվում՝ կանայք և երեխաներ:
Անկարայի հայտնած պաշտոնական տվյալների համաձայն՝ Թուրքիայում ընդհանուր հաշվով ապաստանել է շուրջ 3 միլիոն 700 հազար սիրիացի փախստական, դա համարվում է մեկ երկրից փախստականների ամենամեծ խումբն աշխարհում:
Իդլիբի շրջանում բնակվում է մոտ 3 միլիոն մարդ, և Անկարան ասում է, որ եթե նրանք էլ գումարվեն փախստականների թվին, տարածաշրջանում ու Եվրոպայում կառաջանա աղետալի և անկառավարելի վիճակ:
«Սպիտակ սաղավարտներ» իրավապաշտպան կլազմակերպությունը փորձում է օգնել ռմբահարումների ենթարկվող բնակիչներին:
Իդլիբի նահանգում և հարակից մի քանի շրջաններում դեռ ամուր դիրքեր ունեն զինված ընդդիմության և իսլամիստների խմբավորումների ջոկատները, և նախագահ Ասադը հայտարարել է, որ Դամասկոսն անպայման կվերականգնի հսկողությունը երկրի հյուսիսարևմտյան այդ տարածքի նկատմամբ:
Էրդողանը երեկ Ռուսաստանին ուղղակի չի քննադատել Իդլիբը ռմբահարելու համար, նա հայտնել է, որ թուրքերը և ռուսները պետք է քննարկեն այս հարցը:
«Մենք Ռուսաստանի հետ ամեն կերպ փորձում ենք դադարեցնել այդ գրոհները, վաղը մենք պատվիրակություն ենք ուղարկում Մոսկվա: Նախատեսված են հանդիպումներ, որոնց արդյունքում մենք կորոշենք մեր անելիքը», - երեկ հայտնել է Էրդողանը:
Նրա փոխանցմամբ՝ պատվիրակության կազմում կլինեն արտաքին գործերի և պաշտպանության փոխնախարարները, հետախուզության և ազգային անվտանգության կառույցների ներկայացուցիչները:
Մոսկվայում է Սիրայի արտգործնախարարը
Մինչեռ, այսօր Մոսկվայում է Սիրիայի արտգործնախարար Վալիդ Մուալեմը: Նրան ընդունել է Ռուսաստանի արտաքին գերատեսչության ղեկավար Սերգեյ Լավրովն, ով ասել է, որ օրակարգում Սիրիայում կյանքը խաղաղ և բնականոն հուն վերադարձնելու խնդիրն է, այդ աշխատանքն արդեն մեկնարկել է:
«Դա հնարավոր դարձավ նախևառաջ շնորհիվ Սիրիայի Արաբական Հանրապետության տարածքի վերականգնմանն ուղղված Սիրիայի զինված ուժերի շարունակվող ջանքերին, ինչին աջակցել են Ռուսաստանի ռազմատիեզերական ուժերը»,- ասել է Լավրովը:
Սիրիայի արտաքին գործոց նախարարը քննադատել է Միացյալ Նահանգների քաղաքականությունը:
«Միացյալ Նահանգներն ապօրինի ճանապարհով է օգտագործում Ալ-Թանֆի ռազմակայանը, նրանք այնտեղից անօդաչու թռչող սարքերով հարվածում են մեր նավթային ենթակառուցվածքին, դա ձմռանն է տեղի ունենում, երբ մենք նավթի ու գազի կարիք ունենք»,- ասել է Մուալեմը:
Լավրովը նշել է, որ հիմա անհրաժեշտ է վերականգնել Սիրիայի տարածքային ամբողջականությունը և ստեղծել այդ երկրում շարունակվող համամարտությունը խաղաղ եղանակով կարգավորելու պայմաններ:
