Օրինակ, վաղուց օտարված Մայիսյանի կաթսայատունը, «Հոկտեմբեր» կինոթատրոնը կամ Տրոլեյբուսային պարկի վարչական շենքը դեռ քաղաքապետարանի հաշվեկշռում են, այնինչ բոլորին է հայտնի, որ դրանք վաղուց այլ տերեր ունեն:
Պարզվում է՝ քաղաքապետարանում փնտրել ու արխիվում այդպես էլ չեն գտել օտարման գործընթացի վերաբերյալ փաստաթղթերը:
Քաղաքապետարանի ֆինանսական բաժնի պետ Լենա Ջիլավյանը փաստաթողթերի տրցակ է ցույց տալիս, թե առայժմ ինչ գույք են կարողացել հայտնաբերել, որն այլևս քաղաքապետարանինը չէ:
«Հոկտեմբեր» կինոթատրոնը վաղուց օտարված է «Մոսկվա» կինոթատրոնին, սակայն մինչև օրս քաղաքապետարանի հաշվեկշռում է: Ընդամենը օրեր առաջ են կարողացել ձեռք բերել սեփականության վկայականը:
Ջիլավյանը շարունակում է, թե օտարելու փոխարեն այն կարող էր մնալ քաղաքապետարանի հաշվեկշռում ու միջոցառումների համար ոչ թե վարձակալության վճար տային, այլ կարողանային որպես համայնքային շենք օգտագործել․ - «Միշտ կինո «Հոկտեմբերի» հետ պայմանագիր ենք կնքել, փող ենք փոխանցել, որպեսզի մեր միջոցառումներն անենք այնտեղ»:
Արդյոք համանքապատական գույքը ետ բերելու մեխանիզմ կա՞: Լենա Ջիլավյանը մի օրինակ հիշեց՝ Երիտասարդական պալատի շենքը կարողացել են հետ գնել․ - «Պատկերացնում են, համայնքին պատկանող շենքը օտարել են, թե նվիրատվություն են արել, ես չգիտեմ: Բայց ամեն դեպքում ուրիշինն էր արդեն: Մենք հետ ենք առել 30 միլիոն դրամով: Եվ շենքի վերանորոգման համար բավականին գումար ենք ծախսել, ու դա դարձել է շատ գեղեցիկ Երիտասարդների պալատ»:
Մայիսյանի կաթսայատունը 280 մլն դրամով է օտարվել, գնորդն էլ նախկին պատգամավոր, գործարար Սամվել Ալեքսանյանն էր: Մնացածը թե ինչ արժեքով են օտարվել, հայտնի չէ, քանի որ արխիվային փաստաթղթեր չկան:
Իսկ թե որքանո՞վ են դրանք օրինական ճանապարհով օտարվել կամ արդյո՞ք արժեքը ճիշտ է գնահատվել, այս հարցերի պատասխանը ըստ Գյումրիի ավագանու անդամ Լևոն Բարսեղյանի, իրավապահները կարող են տալ:
Բարսեղյանը պատրաստվում է դիմել դատախազություն․ - «Հարկավոր է բացահայտել, եթե կա հանցագործություն, հանցագործին գույքային պատասխանատվության, չգիտեմ, քրեական կամ ինչ է հետևում սրանից, որպեսզի համայնքին հասցված վնասը փոխհատուցվի»:
Մեկ այլ հանցակազմի մասին էլ բարձրաձայնեց Բարսեղյանը․ - «Պիտի պարզվի, թե ինչու ես կեղծ փաստաթուղթ փոխանցել: Եթե դու դա օրինական ճանապարհով օտարել ես, ինչո՞ւ գույքացանկից չես հանել դա․․․ Այս պրոբլեմները պիտի կարգավորվեն, լուծվեն: Եվ ես չեմ համարում, որ այդ ցուցակները սպառիչ են»: