Տասնյակ հազարավոր մարդիկ այսօր մասնակցել են Սրեբրենիցայի զանգվածային կոտորածների 20-ամյա տարելիցի կապակցությամբ կազմակերպված հիշատակի միջոցառումներին:
1995-ին սերբ գեներալ Ռատկո Մլադիչը լայնամասշտաբ հարձակում սկսեց Սրեբրենիցայի վրա, հուլիսի 11-ին քաղաքն ընկավ, ինչից հետո սպանվեցին շուրջ 8 հազար մահմեդական տղամարդիկ և տղաներ:
Սրեբրենիցայի կոտորածների հիշատակի միջոցառումներին մասնակցել են տասնյակ պաշտոնյաներ, այդ թվում՝ Միացյալ Նահանգների նախկին նախագահ Բիլ Քլինթոնը, ԱՄՆ-ի նախկին պետքարտուղար Մադլեն Օլբրայթը, Սերբիայի վարչապետ Ալեքսանդր Վուչիչը, Թուրքիայի վարչապետ Ահմեթ Դավութօղլուն:
Այսօր միջոցառմանը մասնակցող քաղաքացիները քարեր և շշեր են նետել Սերբիայի վարչապետ Վուչիչի ուղղությամբ: Նա ստիպված է եղել փախչել, իսկ սերբական պատվիրակության անդամները՝ թաքնվել իրենց մեքենաներում: Սերբիայի ներքին գործերի նախարարը տեղի ունեցածը որակել է որպես մահափորձ վարչապետի դեմ: France-Presse-ի հաղորդմամբ, ներկաները նաև սուլել են, երբ Սերբիայի վարչապետը ցավակցությունների գրքում գրառում է կատարել:
Սակայն Վուչիչին դիմավորել են Սրեբրենիցայի զոհերի ընտանիքների անդամները, որոնցից մեկը գրկախառնվել է նրա հետ, մյուսը՝ խորհրդանշական ծաղիկ ամրացրել կրծքին:
Այսօրվա հայտարարությամբ Վուչիչը 1995-ի իրադարձությունները կոչել է «հրեշավոր հանցագործություն»:
«Սերբիան հստակ և աներկբա դատապարտում է այդ սարսափելի հանցագործությունը և իր արգահատանքն է արտահայտում բոլոր նրանց նկատմամբ, ովքեր մասնակցել են դրան», - հայտարարել է Ալեքսանդր Վուչիչը:
Հիշեցնենք, որ Սերբիան հրաժարվում է բոսնիացի սերբերի իրականացրած կոտորածը ցեղասպանություն կոչել, իսկ օրերս Սերբիայի նախագահ Տոմիսլավ Նիկոլիչը ողջունեց ՄԱԿ-ի Անվտանգության խորհրդում Սրեբրենիցայի իրադարձությունները ցեղասպանություն որակող բանաձևի վերաբերյալ Ռուսաստանի վետոն: ՄԱԿ-ի միջազգային արդարադատության դատարանը 2007-ին Սրեբենիցայի կոտորածները ճանաչել է որպես ցեղասպանություն: