Չնայած հորդառատ անձրևին, Գյումրիում ակտիվիստներն անցկացրին նախապես ծրագրված երթը ընդդեմ էլեկտրաէներգիայի սակագնի բարձրացման:
Թատերական հրապարակում կային նաև բավական մեծ թվով ոստիկաններ։ Ակցիայի մասնակիցները հայտարարում էին՝ ոստիկաններն մերն են, ուստի պետք է մեզ հետ հավասար թրջվեն:
Երթի ընթացքում լարվածություն, որևէ միջադեպ առայժմ չի գրանցվել:
Ակտիվիստներից Արմեն Ներսիսյանը «Ազատության» հետ զրույցում ասաց․ - «Այսօր Գյումրիում հորդառատ անձրևի տակ տեղի ունեցավ երթը՝ երիտասարդության բավական մեծ ոգևորության ալիքով: Ինչպես հայտարարել ենք՝ շարունակելու ենք պայքարը մինչև իր տրամաբանական արդարացի լուծմանը: Հետագա քայլերը կախված են նաև Երևանի դիրքորոշումից՝ թե Երևանում ինչպես է շարունակվելու»:
«Զորակցություն հայտնելով մեր Երևանի ընկերներին՝ շարունակվում է և՛ նստացույցը, շարունակվում են և՛ երթերը, շարունակվում է պայքարը: Ուղղակի պետք է փաստեմ, որ ոգևորության ալիքը աննախադեպ է Գյումրիում՝ հատկապես փայլուն երիտասարդության շնորհիվ», - հայտարարեց նա:
