Շաբաթ երեկոյան մի խումբ գյումրեցի երիտասարդներ ավտոերթ անցկացրեցին ընդդեմ էլեկտրաէներգիայի թանկացման։
Երիտասարդները մինչ այդ հանրային քննարկում կազմակերպեցին, որի արդյունքում որոշեցին թաղ առ թաղ, տուն առ տուն շրջել և գյումրեցիներին կոչ անել, որ նրանք հրաժարվեն վճարել էլեկտրաէներգիայի վարձավճարները։
«Էլցանցը կարող է անջատել մարդկանց հոսանքը, բայց մենք հիմա հորդորում ենք, որ չմուծեն։ Կազմակերպիչներից ձևավորվել է անհանդուրժող բանակ, որոնք պատրաստ են գնալ յուրաքանչյուր տուն, որտեղ անջատվելու է հոսանքը, և անհնազանդությամբ միացնեն»,- «Ազատությանը» ասաց ակցիայի մասնակից Արմեն Ներսիսյանը։
«Նպատակը մեկն է՝ նախ հիմնավորված չէ թանկացումը, հետևաբար պատրաստ չենք ուրիշի թալանի համար վճարելու, և կոչ կանենք, որ որևէ մեկը չվճարի։ Հաջորդը՝ ի վիճակի չենք վճարելու, որովհետև սոցիալական էս պայմաններում նորից թանկացումը անհնար է։ Ես վստահ եմ, որ ակցիան համատարած բնույթ կկրի, որովհետև շատերը այլևս ի վիճակի չեն վճարելու»,- նշեց ակտիվիստը։
Ավտոերթին, ակտիվիստներից բացի, միանում էին նաև այլ քաղաքացիներ, ովքեր ևս ասում էին, որ պատրաստ են հոսանք չմիացնել, որպեսզի հարվածեն ՀԷՑ-ի գրպանին և կասեցնեն էլեկտրաէներգիայի թանկացման որոշումը։
