Այսօր ժամը 17-ին «Սուրբ Աստվածամայր» բժշկական կենտրոնում մահացել է 6 ամսական Սերյոժա Ավետիսյանը։ Առողջապահության նախարարությունից «Ազատության»-ը փոխանցեցին, որ փոքրիկի կյանքը փրկել չհաջողվեց։
«Սուրբ Աստվածամայր» բժշկական կենտրոնի տնօրեն Նիկոլայ Դալլաքյանի փոխանցմամբ, երեխայի մոտ մի քանի անգամ գրանցվել է սրտի կանգ, իրենք անընդհատ փորձել են վերակենդանացնել, բայց մի քանի փորձից հետո երեխան մահացել է։
«Երեխան գերադասեց միանալ ծնողներին», - ասաց Դալլաքյանը։
Րոպեներ առաջ նախարարությունը հաղորդագրություն տարածեց՝ նշելով, որ «չնայած տեղի և արտերկրի առաջատար մասնագետների կողմից ձեռնարկված վերակենդանացման շարունակական, երկարատև, անընդմեջ միջոցառումներին` ցուցանիշները բարելավել չհաջողվեց, զարգացավ սրտանթային, թոքային, երիկամային անբավարարություն. անդառնալի փոփոխություններ տեղի ունեցան, որը հանգեցրեց մահվան»։
Երեկ երեկոյան երեխայի առողջական վիճակը կտրուկ վատացել էր: Արդեն 7-րդ օրը կյանքի համար պայքարող երեխայի մոտ խորացել էր երիկամային և սրտանոթային անբավարարությունը:
Հիշեցնենք՝ հունվարի 12-ին Գյումրիում սպանվեցին Մյասնիկյան փողոցի թիվ 188 տանը բնակվող Սերյոժա Ավետիսյանը և ընտանիքի հինգ անդամները։
Ավետիսյանների ընտանիքից կենդանի էր մնացել միայն 6 ամսական Սերյոժա Ավետիսյանը, ում իրավապահները հայտնաբերել էին վիրավոր՝ կրծքի շրջանում կտրող, ծակող գործիքով ծանր վնասված: Փոքրիկը վիրահատվել էր նախ Գյումրիում, ապա Երևանում։
