Եթե Ռուսաստանը հեշտացնի քաղաքացիության տրամադրումը ռուսալեզու դիմորդների համար, ապա Հայաստանում արդեն իսկ առկա ժողովրդագրական ճգնաժամը կխորանա, հատկապես միգրանտները, որոնք այսօր աշխատում են Ռուսաստանի Դաշնությունում, կօգտվեն այդ հնարավորությունից և կհրաժարվեն Հայաստանի քաղաքացիությունից, համոզված է ազգագրագետ Հրանուշ Խառատյանը:
«Իհարկե, նրանք հեշտությամբ կհրաժարվեն Հայաստանի քաղաքացիությունից: Կարծում եմ, որ շատերը ուղղակի կընդունեն և կմնան Ռուսաստանի քաղաքացի: Ավելին՝ հենց հիմա Ռուսաստանում ահռելի թվով Հայաստանի քաղաքացիներ կան, որոնք ուղղակի երազում են Ռուսաստանի քաղաքացիություն ընդունել և իրենց կարգավիճակը լեգալացնել: Նրանք հենց ամենաառաջին դիմողները կլինեն: Ես նույնիսկ արդեն կոնկրետ մարդկանց գիտեմ, որ վաղուց սպասում էին այսպիսի մի օրենքի»,- ասաց Խառատյանը:
Նոր օրինագծի համաձայն՝ նախկին խորհրդային հանրապետությունների այն բնակիչները, ովքեր տիրապետում են ռուսաց լեզվին, քաղաքացիություն կարող են ստանալ երեք ամսում, եթե մշտական բնակություն հաստատեն Ռուսաստանում և հրաժարվեն իրենց երկրի քաղաքացիությունից:
Ցանկացողները պետք է ընդամենը ռուսաց լեզվի քննություն հանձնեն:
Ռուսաստանում մշտապես բնակվելու այս պահանջը Հայաստանի համար կարող է նաև տնտեսական լուրջ հետևանքներ ունենալ, քանի որ այդ դեպքում միգրանտները կնախընտրեն Ռուսաստան տեղափոխել նաև իրենց ընտանիքներին և Հայաստան այլևս գումարներ չեն ուղարկի, ասում է Հրանուշ Խառատյանը:
«Վերջին հետազոտություններ էլ են ցույց տալիս, որ պոտենցիալ արտագաղթի տրամադրությունը 18-20 տոկոսով ավելի է, քան նախորդ տարիներին: Եթե սա արդեն նաև գործողությունների վերածվի, բացի այն, որ Հայաստանը ժողովրդագրորեն լրացուցիչ քանակապես բեռնաթափվում մարդկանցից, սա նաև նշանակում է, որ Հայաստան մտնող տրանսֆերտների զգալի պակաս կառաջանա: Չէ՞ որ այդ գումարներով են մեծ հաշվով մարդիկ կյանքի մինիմալ տնտեսական ակտիվությունը պահպանում»,- ասաց ազգագրագետը:
Հրանուշ Խառատյանի կարծիքով՝ Հայաստանից մարդիկ հեռանում են առաջին հերթին ապագայի նկատմամբ վստահության պակասի պատճառով, և իշխանությունները որևէ կերպ չեն փորձում փոխել իրավիճակը:
«Ես չեմ կարծում, որ իշխանությունը նույնիսկ ցանկության դեպքում կարող է մի բան անել, որովհետև իշխանությունը չի կարող իր օլիգարխիկ համակարգին դեմ գնալ, մեր հասարակությունը չի կարողանում մեր իշխանության այսօրվա վարքի պարագայում որևէ վստահություն ունենալ իր ապագայի նկատմամբ: Չեմ ուզում ասել, որ Ռուսաստանը ունի ապագայի հեռանկար, բայց Ռուսաստանում գոնե իր ներկայի նվազագույն սոցիալ-տնտեսական իրավիճակը լուծվում է»,- ասաց Խառատյանը:
