Հովիկ Աբրահամյանն առաջարկում է թվայնացման մասին օրինագծի շուրջ լրացուցիչ լսումներ անցկացնել

Չորեքշաբթի օրը օրինագիծը, որով սահմանվում է անալոգայինից թվային հեռարձակման անցման կարգը, քննադատեց անգամ Ազգային ժողովի նախագահ Հովիկ Աբրահամյանը։

«Ներկայացված օրենքի նախագիծը, խմբագրելով ամբողջ գործող օրենքը, չի լուծել թվայնացման անցնելու հետ կապված մի շարք էական խնդիրներ», - նշեց ԱԺ նախագահը՝ մանրամասնելով. - «Հստակ չեն կարգավորիչ մարմնի դերն ու գործառույթները։ Առավել եւս, հստակ չէ, թե Հեռուստատեսության եւ ռադիոյի ազգային հանձնաժողովը եւ Էկոնոմիկայի նախարարությունը ինչ լիազորություններով են օժտված եւ ո՞ր մարմինը ինչի համար է պատասխանատու»։

Իր ելույթի ավարտին Ազգային ժողովի խոսնակը նախ քննադատեց կառավարությանը, թերի օրինագիծ Ազգային ժողով ներկայացնելու համար, ապա առաջարկեց կազմակերպել օրենքի շուրջ լսումներ։

«Քանի որ Հանրապետական կուսակցության խմբակցությունը կողմ է քվեարկելու այս նախագծին, առաջարկում եմ առաջին ընթերցմամբ ընդունել, բայց պայմանով, որ հաջորդ շաբաթ կազմակերպելու ենք լսումներ», - ասաց Ազգային ժողովի նախագահ Հովիկ Աբրահամյանը։

Ընդդիմադիր «ժառանգություն» խմբակցությունը հայտարարեց, որ դեմ է քվեարկելու, Դաշնակցությունը, ամենայն հավանականությամբ, կողմ չի քվեարկելու, «Բարգավաճ Հայաստան» խմբակցությունը սպասում է իրենց ղեկավարի որոշմանը։ «Օրինաց երկիր» խմբակցությունը եւ խորհրդարանում մեծամասնություն կազմող Հանրապետական խմբակցությունը կողմ են քվեարկելու օրինագծին։