Дэпутатка Алена Анісім зьбіраецца правесьці круглы стол пра беларусізацыю заканадаўства ў красавіку ў Палаце прадстаўнікоў. Пра гэта яна паведаміла 12 лютага Свабодзе.
Анісім падкрэсьліла, што не спыняе барацьбы за беларусізацыю заканадаўства.
«Чарговая сэсія Палаты прадстаўнікоў пачынаецца 2 красавіка, таму раней правесьці дыскусію не атрымаецца. Я лічу неабходным, каб абмеркаваньне прайшло менавіта ў парлямэнце. Важна сабраць шырокую аўдыторыю, каб прыйшлі прадстаўнікі Нацыянальнага цэнтру заканадаўчых і прававых дасьледаваньняў, дэпутаты, супрацоўнікі міністэрстваў... Спадзяюся праз грунтоўнасьць дасягнуць станоўчага выніку», — сказала Анісім.
Беларусізацыя заканадаўства празь юрыдычны прэцэдэнт
Анісім спрабуе стварыць у Палаце прадстаўнікоў юрыдычны прэцэдэнт: прыняць закон аб нарматыўна-прававых актах адначасова і на беларускай, і на расейскай мове.
Адсутнасьць усіх законаў на беларускай мове — прамое парушэньне Канстытуцыі і немагчымасьць грамадзянам абараніць свае правы ў судовым парадку на падставе юрыдычна правамоцных законаў, лічыць Анісім. А паколькі законаў на беларускай мове няма, то пераклады іх ня маюць юрыдычнай сілы.
Дэпутатка тлумачыць, што гаворка вядзецца пра базавы закон, які рэгулюе «ўсё заканадаўства, усе прававыя акты».
«Пасьля прыняцьця Закону аб нарматыўна-прававых актах можна будзе гаварыць, што мэханізм прыняцьця законаў на дзьвюх мовах гатовы да запуску. Наша задача — вярнуць Беларусь у прававое поле ў справе прыняцьця законаў», — кажа яна.
Рэглямэнт Палаты не забараняе дзьвюхмоўе, але мэханізму пакуль няма
Адначасова з падрыхтоўкай грамадзкай дыскусіі Анісім зьвярнулася і ў камісію па рэглямэнце Палаты прадстаўнікоў.
«Мне казалі, што нібыта рэглямэнт працы не дазваляе прымаць законы на дзьвюх мовах адначасова. Я атрымала адказ з галоўнага юрыдычнага ўпраўленьня палаты. З аднаго боку, там сьцьвярджаецца, што прыняцьце закону на дзьвюх мовах не супярэчыць Канстытуцыі. З другога боку, у рэглямэнце не прапісаны мэханізм такой працэдуры. І апошняе, мабыць, самае галоўнае ў гэтым лісьце: такое пытаньне можа вырашыць кіраўнік краіны. Гэта вельмі цікава, безумоўна».
