23 кастрычніка Вярхоўны суд прыняў рашэньне па касацыйнай скарзе заснавальніка праваабарончай арганізацыі «Плятформа інавэйшн» Міхаіла Жамчужнага.
Пра гэта паведаміла ў фэйсбуку праваабаронца Тацяна Равяка, якая, адзіная з прадстаўнікоў грамадзкасьці, прысутнічала на агалошваньні судовага рашэньня.
«Тэрмін зьняволеньня Міхаілу Жамчужнаму павялічаны на 6 месяцаў. Канчатковы прысуд — 6 з паловай гадоў пазбаўленьня волі. Сёньня першы раз пабачыла Міхаіла. Судовы працэс праходзіў у закрытым рэжыме, але агалошваньне рэзалюцыйнай часткі было адкрытым, чым я і скарысталася», — напісала Тацяна Равяка.
Касацыйную скаргу ў Вярхоўным судзе разглядалі ў закрытым рэжыме таму, што ў матэрыялах справы ёсьць сакрэтныя зьвесткі.
Паводле Равякі, судзьдзя Міхаіл Кашко, які агалошваў рашэньне, назваў павялічаны на паўгода тэрмін зьняволеньня для Міхаіла Жамчужнага — 6 гадоў і 6 месяцаў. Аднак ён не паведаміў, чым гэта матывавана. Пракурор патрабаваў для Жамчужнага 7 гадоў пазбаўленьня волі.
«Міхаіл Жамчужны быў у клетцы, яго ахоўвалі чатыры супрацоўнікі міліцыі. Я зразумела, што ён пазнаў мяне, паколькі павітаўся. Сам выглядае бадзёрым, падцягнутым. Калі мы ў залі чакалі судзьдзю, ён сказаў, што і надалей будзе займацца абаронай правоў зьняволеных», — распавяла сайту spring96.org Тацяна Равяка.
Што тычыцца сутнасьці сёньняшняга судовага паседжаньня, то, паводле Равякі, яно нічога не праясьніла:
«Мы па-ранейшаму спадзяёмся, што зможам атрымаць інфармацыю пра сутнасьць справы Міхаіла Жамчужнага, каб высьветліць, ці ўяўляе інфармацыя, якую ён спрабаваў здабыць, грамадзкі інтарэс і ці тычыцца яна абароны правоў зьняволеных».
Бліжэйшым часам ПЦ «Вясна» мае намер даслаць у Вярхоўны суд запыт на інфармацыю па справе Міхаіла Жамчужнага, бо прысуд яму ўступіў у законную сілу.
Жамчужны ўтрымліваецца ў менскім СІЗА № 1.
10 ліпеня бягучага году Міхаіл Жамчужны быў асуджаны Віцебскім абласным судом на 6 гадоў калёніі строгага рэжыму. Ён быў абвінавачаны па некалькіх артыкулах Крымінальнага кодэксу — гэта наўмыснае раскрыцьцё зьвестак, якія складаюць службовую тайну, незаконнае набыцьцё (выраб) сродкаў для сакрэтнага атрыманьня інфармацыі, якая складае службовую таямніцу, а таксама даваньне хабару.
