Мікалай Статкевіч перадаў у Менгарвыканкам сваю заяву, у якой паведаміў аб правядзеньні 1 траўня сьвяточнага сходу на Кастрычніцкай плошчы.
«У адпаведнасьці з правам, гарантаваным артыкулам 35 Канстытуцыі Рэспублікі Беларусь і падпісанымі нашай краінай міжнароднымі пагадненьнямі, паведамляю пра намер Беларускага Нацыянальнага Кангрэсу далучыцца да сьвяткаваньня дзяржаўнага сьвята — Дня Працы 1 траўня, і правесьці ў гэты дзень на Кастрычніцкай плошчы Менску сьвяточны сход», — гаворыцца ў заяве.
Паводле Статкевіча, акцыя мае пачацца а 14 гадзіне.
«У Беларусі адсутнічае законна абраны парлямэнт і, адпаведна, легітымная працэдура рэалізацыі канстытуцыйнага права на свабоду мітынгаў і дэманстрацый. Таму, у адпаведнасьці з прынятай у суседніх краінах практыкай, паведамляю пра наш намер правесьці 1 траўня сьвяточны сход за 5 дзён да яго пачатку.
Прапаную выканаць патрабаваньні Канстытуцыі і забясьпечыць бесьперашкоднае і бясьпечнае правядзеньне акцыі», — напісаў Мікалай Статкевіч.
Раней Мікалай Статкевіч паведаміў, што Беларускі нацыянальны кангрэс правядзе сваю акцыю 1 траўня ў Менску на Кастрычніцкай плошчы.
Сёньня стала вядома, што Менгарвыканкам дазволіў правесьці мітынг 1 траўня на сцэнічнай пляцоўцы парку Дружбы народаў. Але адмовіў у правядзеньні шэсьця ад Акадэміі навук да плошчы Бангалор, якое замаўлялі незалежныя дэмакратычныя прафсаюзы.
