Сотні чалавек зьехаліся з розных рэгіёнаў Беларусі ў Ружаны на фэст «Ружанская брама», які адбыўся ўжо пяты раз. Тры папярэднія гады мерапрыемства не праводзілася, бо не ставала сродкаў, якія выдаткоўваліся на ранейшыя фэсты з раённага бюджэту.
У адрозьненьне ад мінулых фэстаў, сёлетняя праграма была больш насычаная забавамі для дзяцей — шмат карусэляў, гушкалак ды іншых атракцыёнаў. Не абышлося і без традыцыйных для масавых гуляньняў сталоў ад спажывецкіх таварыстваў з продажам шашлыкоў ды алькагольных напояў.
Прадаваліся сувэніры — вырабы народных майстроў, сярод якіх плеценыя капелюшы, досыць рэдкая чорная кераміка. Адзін з гандляроў прапаноўваў вайсковую форму часоў СССР.
З больш традыцыйных для палацу Сапегаў забаваў былі выступы рыцарскіх клюбаў. З рыцарамі маглі падужацца любыя жадаючыя, а чалавек апрануты ў сярэднявечнага ката прапаноўваў прысутным закаваць галаву і рукі ў драўляныя кайданы.
Фальклёрныя калектывы з розных рэгіёнаў Берасьцейшчыны прадстаўлялі сваю творчасьць са сцэны каля асноўнага корпусу палацу, пасьля іх выступіў расейскі фольк-гурт «Партызан FM», у выкананьні якога, у прыватнасьці, у палацы Сапегаў прагучала ўлюбёная казацкая песьня «Любо, братцы, любо...» Бясплатна для гледачоў выступіў і беларускі гурт «Без білета».
Меры бясьпекі таксама адрозьніваліся ад мінулых фэстаў. На ўваходах на тэрыторыю палацу стаялі амапаўцы, якія выбарачна правяралі торбы наведнікаў. Пляцоўка перад сцэнай была агароджаная, а на ўваходзе таксама стаялі амапаўцы.
Як распавяла ў часе прэсавай канфэрэнцыі намесьніца начальніка аддзелу ідэалягічнай працы Пружанскага райвыканкама Тацьцяна Ярошка, сёлета мясцовыя ўлады ажыцьцявілі ініцыятыву «Павышэньне турыстычнага патэнцыялу пасёлка Ружаны» у межах праекту «Садзейнічаньне разьвіцьцю на мясцовым узроўні ў Рэспубліцы Беларусь», які фінансуецца Эўразьвязам і рэалізуецца Праграмай разьвіцьця ПРААН.
«Раней фэст праводзіўся толькі зь мясцовага бюджэту. Гэта першы раз, калі Эўразьвяз нас падтрымаў з нашай ініцыятывай, і калі Эўрапейскі Зьвяз дае фінансаваньне на „Ружанскую браму“. Канешне, і свой уклад у нас, таксама, значны. Шыкоўнае сьвята з дапамогай заўсёды лепей ладзіцца. Калі партнэры зацікаўленыя робяць адну агульную справу, то гэтая справа ўдаецца заўсёды. А ў нас тут шмат партнэраў і кожны выконвае свой пэўны кавалак працы. І супольна атрымоўваецца прыгожае сьвята — „Ружанская брама“, якое і чакае турыст. На дадзены момант у нас ёсьць рашэньне, што фэст будзе праводзіцца адзін раз на тры гады,» — апавяла Ярошка.
