Ад пачатку чэрвеня ў Курапатах ідуць акцыі пратэсту супраць рэстарацыі «Поедем поедим» за 50 мэтраў ад мэмарыялу. Адзін зь лідэраў пратэсту, сустаршыня аргкамітэту партыі Беларуская хрысьціянская дэмакратыя Павал Севярынец расказаў Свабодзе пра далейшыя пляны актывістаў.
Днём раней актывісты вырашылі ладзіць 12-гадзінную варту пад брамай рэстарацыі.
«Мы зацьвердзілі пляны Чахольскага-Дашкевіча зь дзяжурствам сямі арганізацыяў, — расказвае Павал Севярынец. — Сёньня ўжо „Альтэрнатыва“ пачала.
Заўтра мы ідзем у Генпракуратуру, Дзяржкантроль і Менгарвыканкам, юрыдычная група зьбіраецца і мы пачынаем абыход установаў з адпаведнымі зваротамі.
Акрамя таго, прынялі рашэньне зьвярнуцца да хрысьціянскіх канфэсіяў і габрэйскай дыяспары, а таксама да прэзыдэнтаў, якія плянуюць прыехаць на адкрыцьцё мэмарыялу „Трасьцянец“. Будзем прасіць аўтарытэтных людзей выказвацца па Курапатах.
Хто адказны за рэстаран у Курапатах. Сьпіс асобаў
Сёньня на месцы акцыі ўжо знаходзіцца „мэтраном“: запісаны на аўдыё ўдар звону, які ўключаецца, калі пад’яжджаюць машыны.
Цяпер мы едзем да ўласьнікаў гэтага аб’екту, на Казлова, 5А, „Белрэстінвэст“ і „Белноватэкс груп“. Мы прынялі зварот, зь ім і едзем. Пункт першы — амаральнасьць, пункт другі — незаконнасьць. Мы патрабуем ад іх зьнесьці або перанесьці рэстаранна-забаўляльны комплекс».
Абноўлена: Як піша БелаПАН, кіраўніцтва кампаніі «БелРэстІнвэст» не прыняла заяву, якую спрабавалі перадаць актывісты: па тэлефоне ім сказалі, што кіраўніцтва няма на месцы, дзьверы не адчынілі. Севярынец мяркуе, што ад актывістаў проста хаваюцца.
Што важна ведаць: пратэсты супраць новай рэстарацыі ў Курапатах
- Рэстаран «Поедем поедим» у Курапатах меркавана запрацаваў увечары 5 чэрвеня.
- Грамадзкія актывісты штодня ад 31 траўня пікетуюць забаўляльны комплекс, патрабуючы закрыцьця рэстарацыі.
- 1 чэрвеня рэстаран «Поедем поедим» пачаў рэклямавацца ў інтэрнэце.
- 28 траўня карэспандэнт Свабоды трапіў на тэрыторыю комплексу, дзе пабачыў падрыхтоўку да хуткага адкрыцьця рэстарацыі.
- Адрас рэстарацыі супадае з адрасам ТАА «Амізбел», якое было створана кампаніяй «Белноватэкс груп». Апошняя валодае шэрагам фэшэнэбэльных рэстаранаў у Менску.
- Рэстарацыя стаіць за 50 мэтраў ад месца, дзе ў 1930-я адбываліся масавыя расстрэлы. Карнікі НКВД расстралялі тут ад 30 тысяч да 250 тысяч чалавек.
- Будоўля забаўляльнага комплексу пад назвай «Бульбаш-хол» пачалася ў 2010 годзе ў ахоўнай зоне Курапатаў. У 2014-м ахоўную зону зьменшылі. Гісторыя будаўніцтва і змаганьня тут.
- Першая грамадзкая абарона Курапатаў адбывалася ў 2001–2002 гг., калі моладзь пратэставала супраць пашырэньня кальцавой дарогі праз урочышча. На пачатку 2017-га актывісты адстаялі Курапаты ад будоўлі бізнэс-цэнтру.
Сталінскія рэпрэсіі і Курапаты
У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што пад іх падпалі як мінімум 600 тысяч чалавек. Паводле іншых ацэнак, гэтая лічба дасягае 1,4 мільёна. Але дакладныя лічбы не вядомыя — КДБ дагэтуль не раскрыў архівы. Паводле розных падлікаў, ад 30 да 250 тысяч чалавек карнікі НКВД расстралялі з 1937 па 1941 гады ў Курапатах — лясным масіве пад Менскам.
