«Бэнтлі-Кантынэнталь» 2015 году вытворчасьці, блакітны мэталік. Такое аўто было зарэгістраванае на бізнэсоўцу Казьбека Япрынцава, якога цяпер судзяць у Цэнтральным судзе Менску разам з бацькам Уладзімерам Япрынцавым, былым суўладальнікам «Трайплу», і іх партнэрам Аляксандрам Арабянам.
Усіх трох падсудных абвінавачваюць у прысваеньні вялікіх сумаў грошай праз махлярства.
Сёньня ў судзе казалі пра маёмасьць падсудных, якая была арыштаваная пасьля ўзяцьця іх пад варту. Аказалася, што новенькі Бэнтлі Казьбека Япрынцава арыштаваць сьледчым не ўдалося.
Перад арыштам Япрынцава-малодшага, у жніўні 2015 году, ягоны аўтамабіль клясы супэр-люкс быў прададзены, а празь дзень пасьля арышту -- зьняты з уліку ў сувязі з продажам.
Зь іншай маёмасьці Казьбека Япрынцава былі арыштаваныя машынамесца па вуліцы Веры Харужай, а таксама долі ў некалькіх акцыянэрных таварыствах, у тым ліку «Прастор-трэйд» ды іншых.
Сярод арыштаванай маёмасьці Ўладзімера Япрынцава прагучалі зьвесткі пра аўтамабілі «Хамэр», «Вольва» і «Таёта», а таксама пра дзьве кватэры ў Менску, загарадны дом пад Астрашыцкім Гарадком і два зямельныя ўчасткі.
Таксама былі арыштаваныя долі Ўладзімера Япрынцава ў некалькіх камэрцыйных структурах.
Сьледзтвам былі арыштаваныя і долі ў камэрцыйных структурах Аляксандра Арабяна, супрацоўніка «Трайпла» і дзелавога партнэра Япрынцавых.
У судзе выявілася, што Аляксандар Арабян — грамадзянін Расеі. У Беларусі ён меў від на жыхарства.
Адметная дэталь: аўтамабіль «Бэнтлі» Казьбек Япрынцаў набыў у пачатку 2015 году, калі да яго ўжо былі прэтэнзіі ад партнэраў на некалькі мільёнаў даляраў.
