Эўрапейскі банк рэканструкцыі і разьвіцьця (ЭБРР) падтрымае беларускую дрэваапрацоўку.
У паведамленьні банк удакладняе, што падпісана пагадненьне зь беларускім бокам аб крэдыце на суму 15 мільёнаў эўраў кампаніі «Свудс Экспарт». Гэта дапаможа ёй рэалізаваць стратэгічныя задачы, падвысіць эфэктыўнасьць працы і рэструктурызаваць балянс.
«Свудс Экспарт» базуецца ў Барысаўскім раёне. У склад кампаніі ўваходзяць лесапільная і мэблевая фабрыкі, а таксама фабрыкі вытворчасьці драўляных пэлетаў (паліўных грануляў). Кампанія належыць VMG group у Літве. Апошняя, у сваю чаргу, ёсьць вядучым вытворцам драўнянастружкавых плітаў і мэблі для швэдзкага брэнду IKEA.
Такім чынам, пасьля рэалізацыі праекту «Свудс Экспарт» стане найбуйнейшай лесапільняй у Беларусі з гадавой вытворчасьцю 250 тысяч кубамэтраў драўніны.
Кіраўніцтва кампаніі ўжо заявіла, што плянуе падвоіць выпуск драўняных пэлетаў да 72000 тонаў на год і ажыцьцявіць мадэрнізацыю для задавальненьня попыту на кампанэнты з суцэльнай драўніны ад IKEA. Аляксандар Піваварскі, кіраўнік ЭБРР у Беларусі, верыць у плён двухбаковага супрацоўніцтва:
«Мы разумеем важнасьць дрэваапрацоўчай прамысловасьці для Беларусі, таму радыя падтрымаць пашырэньне кампаніі VMG group. Гэта добры прыклад прымежнага супрацоўніцтва, у якое ўлучаныя так неабходныя наўпроставыя замежныя інвэстыцыі, а таксама найлепшыя галіновыя і экалягічныя стандарты».
За 25 гадоў дзейнасьці ў Беларусі Эўрапейскі банк рэканструкцыі і разьвіцьця інвэставаў амаль 2 мільярды даляраў у разнастайныя сэктары нацыянальнай эканомікі.
