Дзень правоў чалавека пад наглядам міліцыі

Супрацоўнікі міліцыі выклікалі дзьве службовыя машыны, але ўсё ж нікога затрымліваць ня сталі.

А пятай вечара прадстаўнікі Партыі БНФ, абласнога аргкамітэту па стварэньні партыі "Народная Грамада" (Беларуская сацыял-дэмакратычная партыя) і стваранага грамадзкага аб’яднаньня "Рух за Свабоду" выйшлі на вуліцу Леніна з газэтамі "Народная Воля". На знак таго, што ў Беларусі ўлады абмяжоўваюць права на свабоду інфармацыі, некаторыя зь іх завязалі сабе раты.

Тым часам яшчэ некалькі актывістаў раздавалі мінакам брашуры "Што можа даць Беларусі Эўразьвяз", "Даклад Спэцыяльнага дакладчыка па пытаньні аб становішчы ў галіне правоў чалавека ў Беларусі Адрыяна Севярына" і першую кніжку з сэрыі "Закатаваная памяць" прысьвечаную ахвярам камуністычнага рэжыму на Віцебшчыне.

Міліцыянты зьявіліся на месцы правядзеньня акцыі праз 15 хвілін ад пачатку. Убачыўшы спаміж прысутных журналістаў незалежных СМІ і праваабаронцаў, супрацоўнікі міліцыі пачалі раіцца па тэлефоне з кіраўніцтвам, ці затрымліваць пікетоўцаў.

Пад наглядам міліцыі акцыя працягвалася каля гадзіны. За гэты час актывісты пасьпелі раздаць некалькі соцень паасобнікаў друкаваных выданьняў. Міліцыянты нікога не затрымалі.